Gaurkoa izan da Estatu Arabiarren Kontseiluak Eusko Autonomi Erkidegora egin duen lehenengo bisita. Gaur goizeko bilera baino lehen, beste 57 batzar izan ditu Urkullu lehendakariak kontinente guztietako hainbat enbaxadorerekin, eta Uruguaiko presidenteak eta Peruko lehenengo ministroak EAEra bidai ofizialak egin dituzte, Eusko Jaurlaritzako iturriek gogoratu dutenez.
Liga Arabiarraren enbaxadoreak bihar ere Euskal Herrian izango dira, Bakartxo Tejeria Eusko Legebiltzarreko presidentea lagunduko dituela. Besteak beste, gaur arratsean Bilboko toki ordezkariekin izan dira. Confebask enpresarien elkargoarekin , merkataritza ganberarekin edo Aztirekin ere biltzekoak dira.
Ekonomiari dagokionez, 2012. urtean euskal enpresen esportazioak Liga Arabiarra 982 milioi eurokoak izan ziren, EAEren esportazio guztien %4,68 hain zuzen. Gainera, azken urteetan gero eta harreman komertzial sendoagoak izaten ari dira Euskal Autonomi Erkidego eta herri arabiarren artean. Adibidez, gora doaz Saudi Arabiara eta Arabiar Emirerri Batuetara egindako esportazioak baita Iraketik etorritako inportazioak ere.
Arabiar Estatuen Ligako Kontseilua osatzen duten herrialdeek honako hauek dira: Aljeria, Palestina, Arabiar Emirerri Batuak, Egipto, Mauritania, Yemen, Sudan, Libia, Libano, Irak, Qatar, Kuwait, Saudi Arabia, Jordania, Oman, Tunisia eta Maroko. Enbaxadoreez gain Estatu Arabiarretako Ligako hainbat ordezkari ere izan da bileran.
Estatu Arabiar Kontseilua osatzen duten 18 ordezkari hartu ditu gaur goizean Leioan Iñigo Urkullu EAEko lehendakariak. Bilera Artatza jauregian egin dute, "Euskadi eta Arabiar Estatuen arteko harremanak estutzeko", Eusko jaurlaritzak zabaldu duenez. Ekitaldian, lehendakariak azpimarratu du EAE eta herri horien arteko merkataritza harremanak azkeneko urteetan hazten ari direla eta esan du "Euskadi inbertsiorako toki egokia" dela "ekonomia suspertzeko garatzen ari diren politikei esker". Gainera, nabarmendu du euskal enpresek nazioartekotzeko ahalmena dutela eta ahalegina egiten ari direla. Bileran, lehendakariarekin batera, Arantza Tapia, Juan Maria Aburto, Cristina Uriarte, Jon Darpon eta Ana Oregi sailburuak izan dira, baita Marian Elorza Kanpo Harremanetarako idazkari nagusia ere. Argazkian, gaurko bilera / cc-by Irekia - Eusko Jaurlaritza.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun