Solasaldiak, tailerrak eta antzezpenak dira Getxoko Udalak asteazken honetan, abenduak 18, aldarrikatuko den Pertsona Migratzaileen Nazioarteko Eguna dela eta, antolatutako jardueretako batzuk. Besteak beste, gaur, asteartea, “No somos delito” izenburuko solasaldia izango da Villamonteko kultur aretoan, 19:00etan. Toki eta ordu berean, baina bihar, 2013an aurrera eramandako zurrumurruen kontrako ekimenari eta "Ez esan lorokeriarik!" lelopeko kanpainari buruzko ebaluazioa aurkeztuko dute. Ekitaldiari amaiera emateko "Bizilagunak-Aldameneko familia" esperientziari buruzko bideoa proiektatuko da. Ostegunean, 19an, arrazakeriaren kontrako hip-hop tailerra izango da, Chojin rap-eroaren eskutik Utopian zentroan. Domingo Edjang Moreno da Chojinen izena, bere hitzekin indarkeriaren eta arrazakeriaren kontrako baloreak zabaldu nahi dituen rap afro-espainiarraren musikaria. Azkenik, abenduaren 20an, Utopian zentroko 112 ikaslek hainbat antzezpen aurkeztuko dituzte, “Ez da zurrumurru bat, arraza bat, gizakien arraza” lelopean. Argazkian, Utopian zentroko Arantxa Iurre eta Elena Coria zinegotzia joan zen asteazkeneko prentsaurrekoan / © Getxoko Udala.
Utopian zentroko Arantxa Iurre da Udalak bultzatutako zurrumurruen kontrako estrategian parte hartu duen agentetako bat. Berak burututako saioetan ikasitakoa jakinarazi die zentroko gainontzeko irakasleei eta ikasleei. “Udalak antolatutako saioek erakutsi didate immigrazioari buruzko estereotipo negatiboei aurre egiten, agresibitaterik gabe eta era lasaian eta hori ikasleei helarazi diegu. Indarra eta balorea ere eman dizkidate horretan dabilen jendea atzeratuta dagoela agertzeko. Argi dago ez dagoela arraza hobeagorik eta niri indarra eta balorea eman dizkidate saioek horretan ari direnak atzeratuta daudela esateko. Arazoa beraiek dute ez guk", azaldu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun