Sopelako Bilduk aurrekontuak aurrera atera ditu, EAJ eta PSE-EErekin lortutako hitzarmenari esker
Sopelako Udalbatzak 2014rako aurrekontuak onartu zituen atzoko osoko bilkuran. Hori 12.507.899 eurotara helduko da, hots, iaz luzatutako 2012ko aurrekontua baino %4,45 handiagoa (11.975.202 euro), eta inbertsioak 900.000 eurotara helduko dira. Proposamena aurkeztu ostean, alkatetzak hainbat bilera izan ditu akordioak lortzeko asmoa izan duten oposizioko alderdiekin, udal iturriek adierazi dutenez. Azken asteetan, Bilduren udal gobernuak bilerak egin ditu EAJ eta PSE-EEren ordezkariekin, berain ekarpenak jasoz eta proposamenak zehaztuz. "Elkarlanean aritu dira hiru alderdiak, eta azkenik, hiru alderdien esfortzuari esker, 2014. urteko aurrekontua onartzeko adostasuna lortu da", nabarmendu dute Sopelako Udaletik. Akordioan EAJk eta PSE-EEk aurrekontuen onarpena erraztu behar zutela aurreikusten zen, euren babesaren bidez edo abstentzioarekin. Gauzak horrela, atzoko udal bilkuraren bozketa honakoa izan zen: Bilduk alde bozkatu zuen (7), EAJ (7) eta PSE-EE (2) abstenitu ziren eta PP-k (1) kontra bozkatu zuen. Argazkian, udaletxe sopeloztarra / © Sopelako Udala.
Hiru alderdien artean sinatutako akordioan adosten den bezala, 60.000 euro bideratuko dira enpleguaren sustapenerako, 42.000 euro surfaren sustapen ekonomikoaren plana egiteko, 20.000 euro Udalaren plan informatikoa garatzeko, 15.000 euro aterpetxe turistikorako eta 5.000 euro udalerrian "coworking" proiektu bat diseinatzeko. Horretaz gain, akordioan hiru alderdien arteko lantalde bat sortuko dela adosten da, lanpostuen zerrendaz hitz egiteko, eta Sopelako Udalaren Erregelamendu Organikoaren erreforma aztertzeko. Gainera, 2014an liburutegi berriaren oinarrizko proiektua egiteko konpromisoa hartu da. Alkatetzak oso modu egokian baloratu du hartutako akordioa, "enplegua, sustapen ekonomikoa, azpiegitura turistikoak eta Udalaren sistema informatikoak indartzen dituelako". "Azpimarratu behar da irailean adostutako egutegia ia-ia %100-ean bete dela, eta gainera aurrekontua abenduaren 31 baino lehen onartu dela (hori ez da oso ohikoa Udal honetan eta gehienetan)", nabarmendu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun