Álvaro González Getxoko Udalaren Kirol zinegotziak, txapelketaren aurkezpen ekitaldian, Punta Galeako paraje naturalaren berezitasuna nabarmendu zuen, “itsaslabar ikusgarria baitu, 60 metroko garaiera duena, bere oinean hausten den olatua Europako handienetako eta indartsuenetakoa delarik, 200 metroko ibilbidearekin, eta surflaria adituenen oso gustukoa dena. Horregatik guztiagatik, maila handiko proba da, erakargarria, kirolari beraientzat ez ezik, zale eta oro har jendearentzat ere. Horregatik ere, dagoeneko erreferentziazko jarduera da udalerrian. Ekimen interesgarria da kirolaren ikuspuntutik, baina kutsu turistikoa ere eman nahi diogu”.
Borja del Saz Getxo Surf Taldeko presidenteak, bere aldetik, aipatu zuen “txapelketak munduko bazter guztietatik etorritako surflariak ikusteko ematen duen aukera, Estatu Batuak eta Hawaikoekin hasi eta Brasil, Txile eta Perukoekin amaitzeraino. Beste datu garrantzitsu bat da txapelketa zuzenean emango dutela Interneten bidez eta, hartara, Getxo mundu osoan ikusiko da”.
Iazko irabazleak, Natxo Gonzalezek, azkenik, Punta Galeako olatuaren arriskuaz ohartarazi zuen. “Olatu oso arriskutsua da, inoiz ez baitu leku berean hausten. Uretan ondo kokatuta bazaude ere, ez dakizu norantz jo behar duzuen. Zorte handia eduki eta olatuak hartzeko leku zehatzean egon behar duzu”, esan zuen.
Eszenatokia berezia dela eta, parte hartuko duten surflariak itsasontzietatik sartuko dira uretan. Antolaketakoek lau erreskate-motorrak eta Gurutze Gorriko ontzi bat ipiniko dituzte itsasoan. Jendeak –lehorrean bakarrik batez beste 2000 ikusle espero dira- Punta Galeako itsaslabarretik bertatik ikusi ahal izango dute proba, baita itsasotik ontzietan.
Txapelketari buruzko informazio gehiago: puntagalea@3sesenta.tv, www.3sesenta.tv eta 94 461 44 74 / 656 786 320 telefono zenbakietan.
Guztira 24 "rider" guztira, horietatik sei euskal herritarrak, lehiatuko dira igande honetan, 09:00etatik aurrera, Getxoko zortzigarren Punta Galea Challenge-an, olatu handien surf txapelketan. Big Wave World Tour (BWWT) olatu handien munduko zirkuituaren barruko Europako proba bakarra da eta zirkuitu osatzen dutenen sei probetako azken-aurrekoa. Getxo Surf Taldeak, Euskal Herriko Surf Federazioak (EHSF) eta 3Sesentak antolatua, Arnette markak babestua, eta Getxoko Udalak lagundutako saioa da. Sarien atalean, aipatzekoa da aurreko ekitaldien aldean aurten asko igo direla eta 35.000 euro banatuko dituztela esku-dirutan, eta horietatik 12.000 txapeldunak jasoko dituela. Muturreko surfeko sei ordu izango dira, lehiaketa-formatu samurrarekin, seina lehiakideko txanda, finalaurrekoak eta finala jokatuz. Horietan, surflariak, guztiak aditu handiak era honetako probetan, olaturik handiena hartzeko lehian ariko dira. Lehiakideen artean izango dira aurten, Greg Long kaliforniarra, munduko rankingeko Top 18-ko lehena gaur egun, eta Natxo González iazko euskal txapelduna. Horiekin batera beste bost euskaldun, aurtengo ekitaldirako gonbidatu dituztenak, hala nola, Indar Unanue, Jaime Fernández, Axier Muniain, Ibon Amatriain eta David Bustamante "Zuku". Argazkian, txapelketaren aurreko edizio bat / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun