Ekologistek ez dute aurrekoan sortutako Youtube kontu bera erabili eta komunikabideei bidalitako bideoaren esteka hamar minutuz besterik irauten ez duen posta elektroniko batetik igorri dute, 10minutemail.com zerbitzuaren bidez. Litekeena da horrelako aldaketek segurtasun arrazoiak direla medio erabaki izana.
15 eguneko bahiketa
Algortako Portu Zaharrean zegoen "Getxoko Sirenoa" desagertu zen abenduaren 8an. Bi egun beranduago, bahitzaileek agerraldia egin zuten, bideo-parodia baten bidez, bahisaria eskatu eta HAPOren berrikuspenaren gaineko eztabaida zabaltzeko. Erreskateari dagokionez, 15 eguneko epea eman zioten Imanol Landa alkateari eta Getxo Udalari bi eskaeretariko bat betetzeko, aukeran: batetik, "udalerrian erabili gabeko nabe-industrialak eta etxe hutsak egon bitartean, etxebizitza, nabe-industrial zein errepide berririk ez eraikitzeko konpromisoa publikoki hartzea". Ala, bestetik, "Algortako Telletxe eta Areetako Xake plazetan, zuhaitz autoktonoen kimuen mila ale herritarren artean zabaltzea". Bihar beteko zen epea.
Bitartean, Imanol Landak garratz mintzatu zitzaien artelanaren ebasleei, haien ekintzak "Getxoko herritarrekiko erabateko errespetu falta eta intolerantzia erakusten duelako".
"Non dago Sirenoa?"-ren bigarren kapitulua: "Estokolmo Sindromea" (© Non dago Sirenoa?)
Getxoko Udalak eta Imanol Landa alkateak Algortako Portu Zaharreko Sirenoa askatzeko bahitzaileek "jarritako baldintzetako bat ere ez bete arren", arte lana "atzera bueltan izango" da, "urradurarik gabe". Gaur horrela jakinarazi du Argentinako Rio de la Platatik ekarritako argazki erraldoiak berak. Izan ere, ekologistek bideo parodia berria kaleratu dute gaur, "Secuestrame!" leloko kantaz abiatzen dena, eta bertan Sirenoak berba egiten du bere egoera azaltzen, Estokolmoko Sindromeak jota. Gauzak horrela, harrapatu zutenekin bat egiten du hainbat kontutan. Bideoan zehar, kritika gogorrak egin dizkiote Imanol Landa alkateari, EAJ alderdiari, "Getxo auzoz auzo" parte hartze ekimenari eta "El Correo" egunkariari. Bestalde, ekintzaileek Getxoko 8.000 etxebizitzen proiektuaren "porlan orgia" herri mobilizazioak gelditu zuela gogoratu dute eta udalerrian zehar egun auzotarrek hainbat arazo bizi dutela salatu dute, tartean, Aldapa auzoko uholdeak, Romo kultur etxeko lanak edota telefonia antenak. Bitartean, Sirenoaren bahiketak "jasotako babesa kalean islatzeko" eskatu dute, Hiri Antolaketarako Plan Orokorraren (HAPO) berrikusketaren aurrean. Ekologistek barkamena eskatu dute bideoak euskaraz kaleratu ez dituztelako. Argazkian, bideotik ateratako irudia / © Non dago Sirenoa?
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun