Areetako Raspas del Embarcadero Arraun Elkarteak eta Portugaleteko San Nikolas klubak lankidetza hitzarmena sinatu dute, bi elkarteetako arraunlariak trebatzea duelarik helburu nagusi. Javier Gonzálezek eta Jon Imanol Garamendik, Portugalete eta Raspaseko presidenteek, hurrenez hurren, igandean (abenduak 22) sinatu zuten lankidetza hitzarmena, Jarrilleraren egoitzan egindako ekitaldian. Akordioak lau urteko iraupena izango du, 2017ko amaierara artekoa izango da. Eta, horren arabera, Raspas Portugaletekoaren talde hitzartua izango da. Hitzarmena beste lau urtez luza daiteke, bi elkarteek batera halaxe adosten badute. Bertan jasotzen da, besteak beste, Portugaleteko arduradun teknikoek bi elkarteetako senior taldeak ikuskatuko dituztela, hain zuzen ere, bi traineruak osatuko dituzten arraunlariak. Bi elkarteetako arduradun teknikoek ere izango dira denboraldia finkatuko dutenak, entrenamenduen programak eta horien jarraipena planifikatuz. Argazkian, Jon Imanol Garamendik eta Javier Gonzálezek, Raspas eta Portugaleteko presidenteek, hurrenez hurren, igandean sinatu zuten lankidetza hitzarmena, Jarrilleraren egoitzan egindako ekitaldian / © Raspas Arraun Elkartea.
Portugalete eta Raspas Arrauneko buruek oso ondo baloratu dute bi elkarteek sinatutako hitzarmena. Javier Gonzálezek historikotzat jo zuen, “elkarren beharra duten bi talde historikoen artekoa” delako. Portugaletearraren hitzetan, “gezur bako hitzarmena da. Bi erakundeek beren indar guztia erakusten dute, inor ez dago bestearen gainetik, Raspas Raspas da eta Portugalete, Portugalete da". Jarrilleroen buruak Raspasekin kolaboratzeko borondate osoa agertu zuen, KAE 1era igotzen laguntzeko. Garamendik, bere aldetik, Portugaleteri laguntza eta gogo handia eskertzearekin batera, oso pozik agertu zen bi elkarteren artean izandako elkarrizketaren emaitzarengatik, aipatu lankidetza hitzarmena ahalbidetu duelako. “Elkarrizketak elkarren arteko adostasun eta elkar ulertzea izan du emaitza, eta espero dugu horrek bidea seinalatzea. Raspasek oso gustura lagunduko dio Portugaleteri ahal duen guztian eta espero dezagun hartu-eman horren fruitu gisa, arrakasta bi taldeena izatea”, gehitu zuen presidente areetarrak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun