Aurrera doaz Urko paduraren berreskuratze-ekologikoa. Azken asteotan, jo eta su ibili dira lanean Larrabasterrako gune horretan, eta igarri daitezke jada paisaiaren aldaketak. "Abenduaren 28an, padura honen berreskuratzearen lehenengo mugarria jarri ahal izango dugu", adierazi du Sopelako Udalak. Izan ere, biharko auzolana antolatu du tokiko erakundeak. Sopeloztarrek Urko ibarreko proiektua ezagutzea eta bertan parte hartzea izango da jardunaldi horren helburua, "denon eremua izango delako". Horrenbestez, Urko paduraren birsorkuntza ekologikoaren proiektuaren azalpena (hitzaldi txiki bat) emango dute 10:00etatik 10:30era arte. Ondoren, 12:30 bitartean, partzela baten landaketa egingo dute, proiektuak planteatutako bertako zuhaixka eta zuhaitz espezieekin. Azkenik, 12:30etik 13:00etara, hamaiketakoa izango da, indarrak berreskuratzeko. Egitasmoaren helburua Gobela errekaren eta Lemotza errekatxoaren inguruko habitata biziberritzea da, haltzadi eta harizti moduko baso babesleak erabiliz. Ur gezako bi urmael egingo dira, mehatxupeko habitata ezartzeko eta inguruko bioaniztasuna bultzatzeko. Ingurumena biziberritzearekin batera, erabilera publikoa ere sustatu nahi da, igarobide, aisialdi eta naturarekiko harreman gune gisa. Argazkian, irailaren 24an hasi ziren herri-lanak Urko paduran / © Sopelako Udala.
Ibai-basoa birsortzeko, naturak berez, segida ekologikoa erabiliz, emango lituzkeen urratsak azkartuko dira. Lehenengo eta behin, zuhaixkak eta neurri txikiko zuhaitzak landatuko dira. Urtez urte, handituz joatean, berreskuratu egingo dira gerizpe eta freskura baldintzak; lurzorua helduagoa izango da; eta, azken batean, gero eta izaki bizidun konplexuagoen komunitatea hartuko du bere baitan, harik eta baso helduaren klimaxera iritsi arte. Horrela, gure lurraldean gainbeheran dauden habitat, hezegune eta ibaiertzeko basoen multzo bat hartzeko baldintzak betetzen dituen espazio baten ingurumen osasuna berreskuratu nahi da; gainera, bertan egongo ziren espezie asko gaur egun mehatxupean daude.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun