Torresoloko BOEekin "Udalak hiru milioi euro irabaziko dituela" salatu du Leioako EH Bilduk
Torresolon eraikiko dituzten babes ofizialeko etxebizitzen hirugarren promozioaren zozketari dagokion behin-betiko zerrenda (pdf) argitaratu du jada Leioako Udalak. Abenduaren 20an Sakoneta kiroldegian egindako zozketaren emaitzak dira. Aipatu hirugarren promozioan, orotara, 108 etxebizitza banatuko dituzte, garaje eta trastelekuarekin, kooperatiba erregimenean. Hain zuzen ere, zozketa egin aurretik, "berriro ere, kooperatiba pribatu batek jabegoan BOEak eraikitzeko, Udalaren lurzoru publikoa saltzea" egotzi zien Leioako EH Bilduk EAJ eta Ezker Batuari. "Hala ere, gutxik dakite zozketan irabazle izan diren leioaztarrek 3 milioi euro ordaindu beharko dizkiotela Udalari, lurzoru publiko hori erosteko", azaldu du "Hurbildu" aldizkariaren ale berrian koalizio soberanistak. Argazkian, etxebizitzak egiteko lanak Torresolo inguruan / © Leioako Udala.
"Bitartean, ezaguna da hamarnaka leioaztarrek ezetz esan behar izan diotela BOEei bankuak hipotekarik ematen ez dielako. Udalak egoera hau behin eta berriro estaltzen ari da. Honi aurre egiteko modu bakarra Udalaren lurzoru publikoan alokairu sozialeko etxebizitzak eraikitzea da. Posiblea eta beharrezkoa da", gaineratu du Leioako EH Bilduk.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun