Leioako Udalak ere ordu bat beranduago ixteko baimena eman die ostalaritza establezimenduei, urtarrilaren 6ra arte. Taberna, kafetegi, erretegi, txoko eta gainontzeko elkarte gastronomikoek, bigarren taldearen barruan kokatuta daudenak, 02:00etara arte ireki ahal izango dute astelehenetik ostiralera, eta 03:00etara arte jaiegun, igande eta jai bezperatan. Bestalde, hirugarren taldekoak, hau da, pub edo diskotekak, 03:30era arte izango dira zabalik lanegunetan eta 04:30era ostirala, jaiegun eta jai bezperatan.
Bitartean, Sopelan, urtarrilaren 3 eta 4ko asteburuan ere Gabonetako ekitaldiak programatu ditu Udalak. Horrenbestez, aipatu egunetan ordutegia gehienez bi orduz luzatzeko baimena eman du, udal dekretuaren bitartez, Saioa Villanueva Zarandona alkateak.
Urtarrilaren 6ra arte, Getxoko Udalak ostalaritzako 2, 3 eta 4 taldeetako establezimenduen ordutegia "araudiak gehienez baimentzen duenera" zabaldu du, "alorreko jarduerari laguntzeko" helburuarekin. Horrenbestez, abenduaren 31n, eta urtarrilaren 3an eta 4an, bigarren taldeko lokalak (kafetegiak, tabernak eta abar) 04:30ak arte egon ahal izango dira zabalik; hirugarren taldekoek (pubak, klubak eta abar) 06:00etan itxi beharko dute eta laugarren taldekoek (diskotekak..) 08:00etan. Gainontzeko egunetan ordutegia 03:00ak artekoa izango da bigarren taldekoentzat; 04:30ak arte hirugarren taldekoentzat eta 06:30era laugarren taldekoentzat. Ixteko ordutegia heltzen denean, establezimenduen barruan dauden pertsonek 30 minututan egin beharko dute alde, udal arduradunek zehaztu dutenez. Une horretatik aurrera, lokalen barruan egokitze eta garbiketa lanak egin beharko dituztenak baino ezin izango dira egon. Argazkian, parrandazalea gauaz gozatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun