Umorea izango da, beste behin, Gabon Zaharreko programazioaren ardatz nagusia Euskal Telebistako bi kateetan. Barne produkzioko saio bana landuko dira Miramongo ekoizpen gunean. Javier Garcia de Vicuña zuzendari dela, "Euskadi Movie" esketx saioa prestatuko dute Iker Galarza, Andoni Agirregomezkorta, Asier Hormaza, Itziar Atienza, Miriam Cabeza, Maribel Salas, Javier Anton eta Humberto Gutierrez aktoreek 2014. urtearen atariraino. ETB1en, berriz, "Kontrako Eztarria" saioko lagunek prestatuko dute "To Mahatsak!" jai handia. Bertan, ETBko aurkezle eta aktore ezagunenak izango dituzte gonbidatu.
Hitzarmena
Getxoko eta Portugaleteko udalek, El Transbordador de Vizcaya SL enpresak eta ETBk lankidetza-hitzarmena sinatu zuten jarduera hori aurrera eramateko. Saioaren grabazioa abenduaren 12an egin zuten. Lankidetza-hitzarmen horren arabera, ETBk Bizkaiko Zubiaren, eta Getxo eta Portugaleteko udalerrien kolaborazioaren berri emango du saioan zehar eta bi udalerriei buruz eta dituzten baliabide eta eskaintza turistikoari buruz ere aipamen bereziak egingo ditu.
2013ko Gabon Zahar gaueko kanpai-hotsak Bizkaiko Zubitik emitituko dituzte ETB1 eta ETB2 telebista kateek, aurten bere 120. urteurrena ospatzen duen Euskal Autonomia Erkidegoko monumentu entzutetsuena eta Gizadiaren Ondarea den aldetik. Aurten, Euskal Telebistako aurkezle eta aurpegi ezagunek itsasadarrean izango diren bi itsasontzitik eta zubitik gertu agurtuko dute urtea. ETB1en, "Kontrako Eztarria" programako taldeak egingo du kontakizuna: Anjel Alkain, Iker Galarza, Xabier Euzkitze, Jon Plazaola, Sara Cozar, Paulino, Michael Morris eta Alex Sardui. Mahats-aleak ontzian jango dituzte. Halaber, bigarren itsasontzian, Africa Baeta "Teleberri" albistegiko aurkezlea "El Conquistador" saioko lantaldearekin egongo da: Julian Iantzi, Patxi Alonso, Juanito Oiarzabal eta Jose Luis Korta. Urtarrilean hamargarren urtemugako edizioari ekingo dio "El Conquistador del Fin del Mundo" saioak. Argazkian, erakunde ezberdinetako ordezkariak ekimenaren aurkezpenean / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun