Alkateak izendapena eskertu die ekitaldira bildutakoei eta haren partaide egin ditu, gogoratuta "klubek, Getxo Kirolek eta milaka kirolari afizionatuk partekatutako ahaleginari esker, udalerri gizatiarrago, atseginago eta jasangarriago bat eraikitzen ari garela, gure udalerriko bizitzaren eremu guztietara zabaldu nahi dugun kirol jardueraren funtsezko baloreak direlarik”. Gabriel Perez Espainiako ACES erakundeko ordezkariak, bere aldetik, nabarmendu du Getxok “ACESetik indartu nahi ditugun balore ia guztiak biltzen ditu. Udalerrian kirolaren aktore diren guztien arteko loturak harritu gaitu eta horrek kirola baldintza oso onetan egiteko aukera handia suposatzen du”.
2014ko jarduera-egitaraua
2014an sartuta, Getxo Kirolek doako jarduerak abiatuko dituzte herriko sektore guztientzat eta, bereziki, kirolaren udal erakundeak estrategikotzat jotzen dituen sektoreei (adinekoei, eskolako umeei, gazteei eta emakumeei). Izan ere, helburu hori betetzeko, gimnasia-aparatuak dituzten parke publikoak dinamizatuko dira irakasleen bitartez. Aurreikusitakoaren arabera, udaberritik aurrera udalerriko hainbat ibilbidetan barrena ibili edo patinatu nahi duten lagunentzat ere taldeak antolatuko dituzte eta elikadura osasungarriko tailerrak antolatuko dira ikastetxeetan.
Halaber, Getxo Kirolak eta Osakidetza elkarlanean ariko dira laster, udalerriak eskaintzen dituen kirol baliabideei buruzko informazioa eman ahal izateko osasun-zentroetako erabiltzaileei.
Azkenik, udal iturriek zabaldu dutenez, klubek ere "Getxoko kirolarentzat hain berezia den urtea" ospatzeko ekitaldi berriak antolatuko dituzte, udalerrian praktikatzen diren modalitate ezberdinen askotariko eskaintza hiritarrei hurbiltzeko. Besteak beste, skate nazioarteko txapelketa, nazioarteko errugbi talde baten bisita eta lehenengo mailako zenbait futbol eta saskibaloi partida lotu dituzte.
Ekitaldiaren bideoa (© Getxoko Udala)
Bostehunetik gora kirolarik lagunduta, Getxo udalerria 2014ko Europako Kirol Hiritzat egiaztatzen duten zortzi banderak jaso dituzte gaur eguerdian udal agintariek eta EHUko ordezkaritza batek. Hamar bat ikaslek, ikastetxeak ordezkatuz, eta Imanol Landa Getxoko alkateak zein Gabriel Perez Kirolaren Europako Hirien Elkartearen (ACES) Espainiako ordezkariak lagunduta, urte osoan Fadurako kiroldegi aurrean jasota egongo diren banderak igo dituzte. Getxo markako klubetako kirolariak, kirol ikastaroetan parte hartzen dutenak eta ikasleak Fadurara iritsi dira banderak eramanez, udalerria oinez edo korrika eginez zeharkatu ondoren. Imanol Landak berak eta zenbait zinegotzik hartu dute parte Bizkaiko Zubitik, Andra Mari kiroldegitik eta San Nikolas plazatik atera diren ibilbideetan. 2014ko Europako Kirolaren Hiriburu Saria, sari nagusia, alegia, Cardiff Galesko hiriburuak irabazi zuen. Bestalde, Getxorekin batera beste 17 udalerrik jaso dute 2014ko Europako Kirolaren Hiria Saria, inoiz baino saritu gehien egon den urtean. Haien artean daude Santander, Logroño, Kordoba, Pavia edo Brindisi. Beste 14 udalerrik, 2014ko Europako Kirolaren Hiribildua Saria eskuratu dute eta, azkenik, hiru izan dira saritutako komunitateak. Gogoratu beharra dago, hautagaitza aurkeztu aurretik ACES Europeko bazkidetza egin behar duela hiri bakoitzak. Getxoko Udalak aitortu duenez, saria eskuratzeko 10.000 euro gastatu dituzte. Argazkian, gaurko ekitaldiaren irudi bat / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun