Algortako Portu Zaharrean zegoen "Getxoko Sirenoa" abenduaren 8an desagertu zen. Bi egun beranduago, bahitzaileek agerraldia egin zuten, bideo-parodia baten bidez, bahisaria eskatu eta HAPOren berrikuspenaren gaineko eztabaida zabaltzeko. Erreskateari dagokionez, 15 eguneko epea eman zioten Imanol Landa alkateari eta Getxo Udalari bi eskaeretariko bat betetzeko, aukeran: batetik, "udalerrian erabili gabeko "nabe-industrialak eta etxe hutsak egon bitartean, etxebizitza, nabe-industrial zein errepide berririk ez eraikitzeko konpromisoa publikoki hartzea". Ala, bestetik, "Algortako Telletxe eta Areetako Xake plazetan, zuhaitz autoktonoen kimuen mila ale herritarren artean zabaltzea". Epea betetzear, "bahitzaileek" bideo parodia berria kaleratu zuten, Getxoko Udalak eta Imanol Landa alkateak Algortako Portu Zaharreko Sirenoa askatzeko "jarritako baldintzetako bat ere ez bete arren", arte lana "atzera bueltan izango" dela jakinaraziz.
"Non dago Sirenoa?"-ren lehenengo kapitulua (© Non dago Sirenoa?)
"Non dago Sirenoa?"-ren bigarren kapitulua: "Estokolmo Sindromea" (© Non dago Sirenoa?)
Bahitu aurretik Algortako Portu Zaharrean urteetan izan den Rio de la Platako Sirenoaren kopia bat agertu zen pasa den larunbatean, abenduak 28, Mutrikun. "Noticias de Gipuzkoa" egunkariaren agerkari digitalak atzo kaleratu zuen albistea eta, beraz, ez dirudi Inuzenteen Eguneko ohiko txantxa bat. Irudia, Algortan jarritakoa baino dezente txikiagoa, Mutrikuko portuko kofradia zaharreko kaian zintzilikatuta aurkitu zuten. Oraingoz, inork ez du Gipuzkoako ekintzaren egiletza aldarrikatu, baina mutriakuarrek Sireno txikia dagoeneko batailatu ei dute, bere tamainari kasu eginez: "Modesto". "Noticias de Gipuzkoa" egunkariak auzokideei galdetu eta hainbat hipotesi jarri ditu mahai gainean, sirenotxoaren agerpena arrazoitzeko. Besteak beste, portuan bainu eskubidea bermatzeko aldarrikapena, kaian hesi barik dagoen zonaldearen salaketa edota arrantza politika aldatzeko eskaera legez aurkeztu dute. Argazkian, Mutrikuko sirenotxoaren albistea "Noticias de Gipuzkoa"-ren webgunean / © "Noticias de Gipuzkoa".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun