2008ko urtarrilean, banda magnetikodun Gizatrans txartela jarri zen martxan; "izaera soziala eta tarifa hobariduna" zuen, Partzuergoaren arabera, eta "adin jakin bateko edo maila jakin bateko ezintasun fisiko edo psikikoa duten pertsonentzat sortu" zela azpimarratu dute. Ondoren, zenbait ekintza pilotu egin eta gero, 2012ko urrian kontakturik gabeko Barik txartela modu masiboan merkaturatu zen, oro har bidaiari guztientzat.
Lurraldeko garraioa hobetzeko "aurrerapauso handia izan zen" Creditrans, "aurreko sistemarekin alderatuta abantaila nabarmen ugari ekarri baitzituen, hala nola bidaia merkeagoak, garraiobidez aldatzeko aukera, bidaiarientzat bidaiatzea askoz erosoagoa eta errazagoa izatea, eta txartel bakarrarekin Bizkaiko garraio sare osoan mugitzea ahalbidetzea".
Barik
2012ko urrian Barik modu masiboan martxan jartzearen ondorioz, abantaila horiek guztiak garraioa ordaintzeko modu berri batean bildu ziren, baina, horiez gain, Barik txartelak ematen dituen gainerako "beste onura batzuk" ere gehitu behar zaizkio: "erosoagoa da erabiltzaileentzat", txartelak ez baitu kontakturik behar baliogabetzeko; gehiago irauten du (lau urte, lehen urtebete bakarrik); saldo gehiago karga daiteke, 90 euroko mugarekin; formatua askoz seguruagoa eta sendoagoa da magnetikoa baino; eta laster, Internet bidez kargatu ahalko da, bai eta Bizkaiko 83 kutxazainetan ere.
Gaur egun arte, 800.000 Barik txartel baino gehiago banatu dira, hilean 10 milioi aldiz erabiltzen da, eta txartel bidez ordaintzeko sistemaren barruan %93,54ko sartze kuota du Barik Kide txartelarekin (normala edo zuria) eta %98,99koa ezintasunen bat duten pertsonentzako eta pertsona nagusientzako Giza txartelarekin (gorria).
Creditrans txartela Bizkaiko bidaiarien garraio sare osoan erabiltzeko aukera bukatuko da gaur, abenduaren 31n, bere iraunaldia amaituko baita. Horrenbestez, bihartik, urtarrilaren 1etik, Barik baino ezingo da erabili, apiriletik Bizkaiko Garraio Partzuergoak (BGP) jakinarazi zuen moduan. Gauzak horrela, oraindik orain Creditrans txartelen batean dirua duenak gaur gastatu dezake edo Barik txartelen batera diru hori pasatu. Halere bi baldintza ezarri ditu BGPk. Alde batetik, transferentzia egiteko epemuga jarri dute: otsailaren 28a. Beste aldetik, txartel bakoitzeko gehienez ere hiru euro besterik ezin izango dira sartu. Gerta daitezkeen zalantzak argitzeko telefonoa jarri dute: 901 123 123, alegia. BGPk gaur albiste-agentziei gogorarazi dienez, 2000ko irailean martxan jarriz zenetik, Bizkaiko garraioan 1.030 milioi bidaia baino gehiago egiteko erabili da Creditrans, eta 93 milioi txartel baino gehiago saldu dira. Tarte horretan, pixkanaka, lurraldean balia zitezkeen aukera desberdinak barne hartzen joan zen, harik eta garraio publiko osoan erabiltzen hasi zen arte. Argazkian, 2013ko maiatzaren 31n, Metro Bilbaok eta Bizkaiko Garraio Partzuergoak bidaiatzeko Creditrans bono erraldoiak eman zizkieten bost erakunderi, tartean Uribe Kosta elkarteari / © Metro Bilbao.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun