Iragan den irailaren 1ean Tas-Tas irrati libreak ateak itxi zituen, 21 urtez emititzen jardun eta gero. Irailaren 30az geroztik, Gasteizko Hala Bedi irrati librea emititzen hasi zen Tas-Tasen frekuentzia beretik –FMko 97.0a–. Hain zuzen ere, Tas-Tasek eta Hala Bedik hainbat urte eman zituzten zenbait programa konpartitzen. Hala Bedik bere gain hartu ditu emisioak dakartzan gastuak, harik eta 2014ko otsailera arte. Neurri horri dela eta, inongo merkataritza-emisorak ezin izango du 97.0 frekuentzia okupatu eta, aldi berean, Bilbon Tas-Tas ordezkatuko duen irrati libreko proiektu berria finkatzeko astia egongo da. Horren haritik, Bilboaldean lanean ari diren hainbat gizarte-kolektibori lotutako jendeak eta Tas-Taseko kide ohi batzuek Bizkaian Hala Bediren Emisioari Laguntzeko Taldea osatu dute. Bere helburua proiektuari atxikiko zaizkion eta hilean 10 euro emango dioten 100 lagunetik gora lortzea da.
Talde sustatzaile hori ostegunetan elkartzen ari da, Zirikaren lokalean arratsaldeko zazpietan. Proiektuan interesatuta dagoen pertsona ororentzat irekita dago.
Taldearekin harremanetan jartzeko:
• www.97irratia.blogspot.com
• 97puntocero[abildua]gmail.com
Bilboko Zazpi Kaleetako Zirika! herri guneak iluntzeko 8etan hartuko du gaur 97 irratiaren aurkezpena, "La nueva radio libre en construccion de Bizkaia" lelopean. Irailaren 1ean desagertutako Tas-Tas irratiak zuen FMko 97.0 dialerako prestatzen ari diren irrati librearen sustatzaileek zabaldutakoaren arabera, Bizkaia mailakoa izango da "eraikuntzan" dagoen egitasmo berria. Aurretik, ordea, pasa den abenduan, "Bilboko metropolian" kokatu zuten komunikabide berriaren eragin arloa. Era batean zein bestean, Uribe Kostan eta Erandion 97 irratia entzun ahal izango dela ziurtzat jo daiteke. Gaurko aurkezpenaz gain, Errondabide 12ko lokalak 30 bat jendarte kolektiboren Herri Denda dauka martxan, urtarrilaren 6ra arte zabalik egongo dena. Beste askoren artean ekologismoa, internazionalismoa, feminismoa, komunikazio librea, preso politikoak, kultura, inmigrazioa edota antimilitarismoa esparrutako materialak topatu daitezke bertan. Argazkian, 97 irratiaren behin behineko estudioa / © 97 irratia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun