Gainera, denboralearekin haizea ere bortitzagoa izango da. Larunbat goizaldean eta lehen orduetan hego-ekialdeko haize-bolada gogorrak izango dira, batez ere, Bizkaiko eta Arabako mendi-inguruetan. Eguerdi aldera iritsiko den fronte batek haizearen norabidea ipar-mendebaldera aldatuko du bat-batean. Fronte horren eraginez, larunbat arratsalderako zaparradak espero dira, eta baliteke zakarrak izatea.
Era berean, altuerako aire hotzak ekaitzak eta txingorra eragin ditzake. Elur-mailari dagokionez, larunbat arratsaldean azkar jaitsiko da 700-800 metrotaraino. Dena den, igande goizeko lehen orduetan azkar igoko da 1.200-1.300 metrotaraino.
Laburbilduz, Atlantikoko depresio sakonek olatu zakarrak eragingo dituzte, itsasaldi biziek nabarmenduko dituztenak, eta depresioei lotutako fronteek ekaitzak eta elurra ekarriko dituzte, maila erlatiboki baxuetan.
Oharra: Eguraldi iragarpenak eta abisuak Euskalmeten bidez jarraitzea gomendatzen da (http://www.euskalmet.net). Abisuen kasuan, jarraipena Twitter bidez egitea aholkatzen da (@Euskalmet).
Eusko Jaurlaritzako Segurtasun Sailak alerta laranja ezarri du kostaldean, biharko 00:00etatik igandeko 9:00ak arte, 5 metrorainoko altuera izan ditzaketen olatuak egon daitezkeelako. Euskalmet Euskal Meteorologia Agentziaren iragarpenen arabera, azken 15 egun hauetan Uharte Britainiarretatik gertu dauden depresio atlantiko jarraituen eragina jaso dugu, eta depresio horiek sortuko dituzte hurrengo egunetako olatu bortitzak. Gainera, larunbatean eta igandean, depresioek haize gogorrak eta tenperaturen eta elur mailaren jaitsiera laburrak ekarriko dizkigute. Itsasoaren eta kostaldearen egoerari dagokionez, Euskalmetek iragarri du gaur arratsaldean hasiko dela olatuen altuera handitzen, eta egunaren azken orduetan 4 eta 4,5 metro artekoa izango dela. Larunbatean eta igandeko lehen orduetan, berriz, olatuak 4,5 eta 5 metro artekoak izango dira. Igandean olatuen altuera txikituko da eta egunaren azken orduetan 3,5 metro ingurukoa izango da. Bestalde, kontuan izan behar da itsasaldiak biziak izango direla, eta horrenbestez, baliteke egoera zaila izatea kostaldean. Itsasgorak eta olatuen altuerarik handiena larunbatean 06:28an eta 18:58an eta igandean 07:18an izango dira. Argazkian, hainbat lagun itsasontzia lotzen artxiboko irudi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun