Gaur, asteartea, Fracking Ez Getxo plataformak bilera egingo du Itzubaltzeta / Romoko kultur etxean, arratsaldeko 7etan. "Fracking-a Getxon martxan jarriko dutela ikusita, horri aurre egiteko elkartu den auzokide talde bat gara", azaldu dute plataformako kideek. Bilera irekia dela eta bertan parte hartzeko interesa duen oro gonbidatuta dagoela ere adierazi dute. Izan ere, taldea indartzea du xede gaurko batzarrak. Fracking-a edo haustura hidraulikoa gasaren erauzketa eta ustiatzeko teknika bat da, "presio handiko fluido baten bidez harri-geruzak hausteko eta gas naturala erauzteko teknika". Gasa eskuratzeko, "bertikalean milaka metro zulatu behar dira erreserbak dituzten harri-formazioetara heldu arte. Ondoren, harea eta hainbat produktu kimiko erantsita, milioika litro ur injektatzen dute presio handian, gas naturala biltzen duen harkaitza zartatzeko, gasa askatzeko eta azalera arte igotzeko", Fracking Ez Getxok azaldu duenez. Txertatzen diren gehigarri kimiko horiek, 260 inguru, "osasunerako kaltegarriak izan daitezke, minbiziak, alergiak zein azaleko, begietako, digestio-sistemako eta arnasteko gaixotasunak eragin baitituzkete, besteak beste", ekologistek salatu dutenez. Argazkian, Patxi Lopez lehendakari ohia Texasen, fracking-aren alde / cc-by Irekia - Eusko Jaurlaritza.AEBetik Euskal Herrira
Euskal Herrian 2011ko urriaren 14an ezaguna egin zen fracking-a. Izan ere, egun horretan, Patxi Lopez EAEko lehendakariak AEBeko Texas Estatuko Heyco enpresako erauzketa plantatik iragarri zuen Araban, Bizkaian eta Gipuzkoan fracking-a egiteko asmoz EEE Energiaren Euskal Erakundeak Heyco eta Cambria Europe enpresa estatubatuarrekin partzuergo bat sortu zuela. Esku artean izan zuten lehen proiektua Araban kokatu zen, Enara Handia izenekoa.
Halere, Uribe Kostan ere, lur azpiko ubide edo akuiferoak kalte ditzaten teknika hori erabiltzeko planak badaude. Bartzelonan erregistratutako Frontera Energy Corporation SL nazioarteko enpresak Geminis proiektua gauzatzeko baimena eskuratu du Espainiako Industria Ministerioaren eskutik. 47.940 hektarea hartuko ditu, itsasoan eta lurrean, barnean ia Uribe Kostako eskualde osoa dagoela. Eremu horretan lur azpiko biltegietan egon beharrean harriei itsatsita dagoen gasa ustiatzeko fracking sistema bideragarria eta errentagarria den ikertuko nahi dute. Teknika horrekin, eztanda txikiak egiten dira haitzetan, arrailak sortu eta horietatik ura (% 98) eta gai kimikoak (% 2) isurtzeko. Gai kimikoak lurzorura edota akuiferoetara iristen badira, kutsatu egiten ditu. Oraingoz, Plentzia, Gorliz eta Sopelako udalek jada ezetza eman diote praktika horri.
Maiatzaren 30ean, fracking-aren teknika “normalizatzeko” lege-proiektua eztabaidatu zen Senatuan; 29an, aldiz, teknika debekatzeari uko egin zion Eusko Legebiltzarrak.
Fracking-aren mapa Euskal Herrian
Enara Handia proiektuaren aldeko bideoa (© EEE Energiaren Euskal Erakundea)