Almandoz izan ezik, beste abokatu guztiak 2012an EPPK-k izendatu zuen Mintzaidetza Lanetarako Taldeko kideak dira, beste batzuen artean. Espainiako Barne Ministerioaren arabera, "hilabeteak" zeramatzan Guardia Zibilak abokatuen arrastoan.
Berria.info-k zabaldu legez, Lopez de La Calle izan da Bilboko egoitzatik atxilotuta eraman duten lehena. Tantaz Tantak gaineratu du Jon Enparantza eta Jose Miguel Almandoz ere atera dituztela. Zuluetaren etxe ohiaz gain, beste miaketak egiten dihardute Donostiako Antigua auzoan eta Bilboko Otxarkoaga eta Atxuri auzoetan, Enparantzaren, Sagarminagaren eta Lopez de Lacalleren etxeetan. Donostian zein Bilboko Elkano kalean jende anitz bildu da. Sortuk agerraldia egingo du 18:00etan.
Arantza Zulueta
Arantza Zulueta abokatua eta Lemoizko bizilaguna aurretik birritan atxilotu dute, beti ere Espainiako Auzitegi Nazionalaren aginduz. 2010eko apirilaren 14an, atxilotu zuten lehenengo aldiz, euskal preso politikoen abokatuen eta senideen aurkako sarekadan, Saioa Agirre eta Erramun Landarekin batera, eta urte bereko abenduaren 2an aske utzi zuten, baldintzapean, 60.000 euroko bermea jarri ostean. Zazpi hilabete besterik ez zuen kalean egin abokatuak. Izan ere, Fernando Grande-Marlaskak berriro galdekatu eta aske utzi zuen martxoan, baina uztailaren 13an Zulueta atxilotu eta espetxeratzeko agindua eman zuen. Zulueta Hernanin atzeman zuen Guardia Zibilak, ETArekin zerikusia izatea egotzita. Lau hilabete pasatuta, 2011ko irailaren 15ean, aske utzi zuten, beste 60.000 euroko fidantzapean. Orduan, Auzitegi Nazionaleko Zigor Aretoak Zulueta ustezko delitu beragatik birritan atxilotzea leporatu zion Grande-Marlaskari. Pasa den larunbatean, Durangon burututako EPPKko preso ohien agerraldian izan zen Arantza Zulueta, besteak beste, Mitxel Sarasketa, Iñaki Gonzalo Casal eta Fernando Etxegarairekin batera.
Guardia Zibilak EPPKko presoen abokatuen aurkako sarekada abiatu du arratsaldean, Eloy Velasco Espainiako Auzitegi Nazionaleko 6. Instrukzio Aretoko magistratuaren aginduz. Dagoeneko Bilboko Elkano kaleko egoitzan sartu da institutu armatua eta bertan hainbat lagun atxilotu egin ditu, gutxienez zortzi, Jorge Fernandez Diez Espainiako Barne Ministroak baieztatu duenez. Izan ere, Barne Ministerioak iragarri egin du bere webgunean sarekada burutzen ari zela eta, behin zabalduta, albistea kendu egin du. Gasteiz, Iruñea eta Hernaniko lokaletan ez da poliziarik sartu, Berria.info-k adierazitakoaren arabera. Halere, Gipuzkoako egoitzan "giro txarra" sumatu duteneko abisua eman dute. "El Mundo" egunkari espainolaren edizio elektronikoaren aburuz, Bilbon atxilotuak Lemoizen bizi den Arantza Zulueta, Jon Enparantza, Aitziber Sagarminaga, Jose Luis Campos, Egoitz Lopez de Lacalle eta Jose Miguel Almandoz dira. Bestalde, Asier Aranguren eta Miren Aintzane Orkolaga atxilo hartu dituzte Iruñean eta Donostian, hurrenez hurren. Zuluetak Lekeition izan zuen etxea ere miatu dute, "Hitza"-k jakinarazi duenez. ETAko kideak izatea leporatzen diete. Are gehiago, "Espainian egun erakunde terroristak duen estruktura aktibo bakarra" osatzen dutela diote. Operazioa zabalik dirau. Bizkaian, atxiloketei erantzuteko bat-bateko manifestazio deialdia luzatu du Bilboko Sortuk. Gaur iluntzeko 8etan Bilboko udaletxetik aterako dira. Argazkian, Guardia Zibila Bilboko Elkano kalean / © Maribi Ugarteburu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun