Plentziako Udalaren abisua: Zer egin foka bat aurkitzen badugu?
Itsas-txakurrak haien bizitzaren zati handi bat uretan pasatzen duten itsas ugaztunak dira. Baina uretatik irten ohi dira atseden hartu beharra dutenean. Beraz, ez da arraroa fokaren bat ikustea hondartza batean etzanda, arroken gainean edota portu batean.
Horrelako kasuetan hartu beharreko neurriak zein diren ikasi beharra dugu. Oso garrantzitsua da unean bertan larrialdi zerbitzuei (SOS Deiak-112 edo Ambarren Lehorreratzeen Sarea-656719686) deitzea, oharra animaliaren egoera zein den ikustera joango diren teknikariengana iristeko.
Egoeraren berri eman ondoren, argibide sinple hauek jarraitu behar ditugu:
1. Ez hurbildu animaliarengana. Arrazoizko segurtasun distantzia mantendu behar dugu. Itsas-txakurren besoak eta lepoa motzak dira eta haien “tresnarik” gustukoena ahoa da. Mehatxupean daudela sentitzen badute hozka egin dezakete eta animalia indartsuak dira (hozkek eragindako zaurietan infekzioak erraz
garatu daitezke).
2. Ez oztopatu uretara itzultzeko ihes bidea. Beti bidea libre utziko dugu, fokak nahi izanez gero, oztoporik gabe itsasora itzultzeko modua izan dezan.
3. Txakurrak uhalarekin lotu eta ez utzi fokarengana hurbiltzen. Aurrez aipaturiko arrazoiengatik.
4. Oihurik ez egin eta zaratarik ez atera. Lasai egon behar dugu, iskanbila handiegirik sortu gabe, itsas-txakurrari estres izugarria eragin baitiezaiokegu. Gainera, lasai bagaude eta oihurik ateratzen ez badugu,elkarrekin lana egitea errazagoa izango da eta gure lana, zalantzarik gabe, eraginkorragoa.
5. Animaliaren espazioa errespetatu. Fokak toki hori aukeratu du bere bidaiarekin jarraitu aurretik deskantsua behar duelako. Ordu asko igaro ditu uretan eta estutzen badugu, ezingo da indarberritu, ziurrenik berriro uretara ihes egingo baitu.
6. Arduradunei eta Ambarreko boluntarioei ahalik eta gehien lagundu. Gure helburu bakarra animaliaren eta haren inguruko pertsonen ongizatea bermatzea da. Guztion artean lankidetzan jarduten
badugu, lana askoz errazagoa izango da eta esperientzia, berriz, oso positiboa.
Foka batek atseden hartzeko gure lurraldea aukeratu izana pribilegio bat dela ulertu behar dugu, izan ere, itsasoko altxor bat azaleratu zaigu guregandik gertu. Ikasi dezagun itsasoak eskaintzen diguna errespetatzen, horrela, animalia hauek gure hondartzetara itzuliko baitira, haientzat toki lasaiak eta seguruak bilakatuko direlako.
Plentziako Udala
Urtarrilaren 2ko gauean foka edo itsas txakur gris gazte bat Gorlizko Fauna Basatia Sendatzeko Foru Zentrora eraman zuten. Itsas txakurrak osasun egoera kaxkarra zuen, beste animali batek egindako hozkadengatik hainbat traumatismo zuelako. Horrez gain, pisu eskasa zuen. Bestalde, astelehenetik asteartera doan gauean beste foka bat ageri zen Plentziako areatzan, Arkote arraun taldeko lokaletik gertu. Ambar itsas fauna ikertzen duen koordinakundeak azaldu duenez, itsas txakur grisak Bizkaiko Golkotik iparrera murgiltzen ohi dira, kolonia ugari dutela Irlanda, Ingalaterra eta Herbehereetako urtean. Halere, hainbat faktorek eraginda itsas txakur gris gazteek ohiko lekuetatik urrundu dira azken urteotan, Kantauri itsasoara helduz. Besteak beste, azken egunotako ekaitzak eta espeziearen ugaritzea Euskal Herriratzeko arrazoi gisa jarri dituzte Ambarreko kideek. Fokak portuetara heltzen dira olatu handietatik babestera eta indarberritzeko han aurkitzen dituzten arrainak jatera. Bestalde, Ambarrek zein Plentziako Udalak hiritarrei tentuz aritzeko deia egin diete. Argazkian, foka Plentzian / © @bengoetxea73.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun