Guardia Zibilak atzo 15:30 aldera abiatu zuen EPPKko presoen abokatuen aurkako sarekada, Eloy Velasco Espainiako Auzitegi Nazionaleko 6. Instrukzio Aretoko magistratuaren aginduz. Zortzi lagun atxilotu zituzten: Lemoizen bizi den Arantza Zulueta, Jon Enparantza, Aitziber Sagarminaga, Jose Luis Campos, Egoitz Lopez de Lacalle, Jose Miguel Almandoz, Asier Aranguren eta Miren Aintzane Orkolaga.
Arratsaldean abiatutako polizia operazioa bart goizaldera arte luzatu da. Ordu horretan sartu zen Guardia Zibila Euskal Preso Politikoen Kolektiboaren (EPPK) abokatuen Bilboko Elkano kaleko bulegoan, eta bertan izan dira Arantza Zuluetarekin 04:30era arte. Alfonso Zenon abokatua izan da Zuluetarekin miaketan zehar. Atxilotua bulegotik ateratzean, babesa adierazi diote hainbat lagunek. Ordu batzuk lehenago, arratsaldean, Ertzaintza gogor oldartu zitzaien bertan bildutakoei, lagun bat zaurituz eta atxilotuz. Basurtuko ospitalera eraman behar izan zuten gaztea, buruan kolpe bat zuela.
Euskadi Irratia aipatuz, Naiz.info agerkari digitalak zabaldu duenez, dagoeneko Madrilen egongo lirateke zortzi atxilotuetatik zazpi. Arantza Zulueta Bilboko La Salveko kuartelean izango litzateke oraindik Madrilera noiz eramango zain, aipatu irrati kateari Espainiako Barne Ministerioak adierazitakoaren arabera. Atxiloaldi komunikatuan daude zortziak. Beraz, konfiantzazko abokatuarekin egoteko aukera izango omen dute. Hala ere, dirudienez ez dute gaur Eloy Velasco epailearen aurrera eramango.
Erandioko mobilizazioaren kartela
Agerraldia egin dute gaur goizean hainbat eragile politiko, sindikal eta sozialek, EPPKren mintzakideen kontrako polizia operazioaren aurrean balorazioa egin eta mobilizazioak iragartzeko. Agerraldian izan dira, besteak beste, EA, Aralar eta Sortu alderdietako, gehiengo sindikaleko eta Etxerat elkarteko ordezkariak, Berria.info agerkariak zabaldu duenez. Bakearen alde daudenei oztopoak gainditzeko lanean jarraitzeko eskatu diete. Presoen eskubideak errespetatzea ere galdegin dute. "Erabat arbuiatu" dituzte atxiloketak, eta dei egin dute gaur arratsaldean herrietan eta bihar eguerdian hiriburuetan egingo diren elkarretaratzeetara joatera. Besteak beste, gaur iluntzerako mobilizazioa deitu du Erandioko Sortuk. Hitzordua 20:00etan jarri du metro geltoki aurrean. Leioan ere, ordu berean irtengo dira Boulevard-etik, "atxilotuak askatu! Errepresioa ez da bidea" lelopean. Gorlizen, aldiz, elkarretaratzea egingo dute arratsaldeko 7etan, Motan. Plentzian, 20:30etik aurrera, Pruli plazatxoan kontzentrazioan eskatuko dute konponbideari erasorik ez egiteko. Argazkian, ehunka lagun elkartu ziren atzo Bilbon, polizia operazioa salatu eta Guardia Zibilak eta Ertzaintzak atxilotutakoei zein gertukoei elkartasuna adierazteko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun