Eusko Jaurlaritzari Udondo ibaiaren gaineko zubia babesteko espedientea zabaldu eta Kultura Ondare izendatu dezan eskatzea onartu du gaur goizean Bizkaiko Batzar Nagusien Kultura eta Euskara Batzordeak. Oposizioaren talde guztiek (EHBildu, PSE-EE eta PP) bat etorri dira popularrek aurkeztutako arauz besteko proposamena babestean. EAJ, aldiz, abstenitu egin da, ondareari buruzko horrelako ekimenak Eusko Legebiltzarrean adostu behar direla iritzita. Onartutako testuaren arabera, zubiari monumentu kategoria onartzea eskatu dute Batzar Nagusiek. Horretarako, "historian duen garrantzia" zein pasabidea egiteko erabilitako "industria ondarearen elementuak" azpimarratu ditu Arturo Aldecoa batzarkide popularrak. Izan ere, zubiaren burdin zati batzuk eraikitzeko Bilboko Areatzako zubi zaharraren "azken hondakinak" erabili zituzten. Udondoko zubia Gobela eta Udondo ibaien bokalea zeharkatzen duen zubia da, BI-711 errepidearen zati bat izanik. Leioako Udondo auzoan dago, Erandioko Axpetik hurbil. Udondo auzoan badaude beste zubiak ere baina hau da izena daramana. Argazkian, Udondoko zubia / cc-by Javier Mediavilla Ezquibela.
Areatzako pasabidea 1847an ireki zen eta orduko Espainiako erregina zen Elisabet II.a Borboikoaren omenez Elisabet II.aren zubia izena jarri zioten. Hasieran altxagarria bazen ere, 1866tik aurrera ez zuten berriro zabaldu. Pixkanaka-pixkanaka okerrera egin eta zurezko hiru arku egin behar zituzten. 1878an, Hirugarren Gerra Karlista eta uholdeak eta gero, hiru harrizko arku eraiki eta behealdetik gabarra eta itsasontzi txikiek baino ezin zuten pasatu. Zubitik, berriz, tranbia eta oinezkoak pasa ziren. 1936ko Gerran, zubia leherrarazi zuten, 1937ko ekainean, Armada faxista hirian sartu aurretik. Aldecoak gogoratu duenez, Areatzakoa Espainiako Estatuan zegoen biadukturik zaharrena zen, Sevillako Trianakoarekin batera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun