Getxo Artea Rugby Taldeak Espainiako Errege Kopatik kanporatua izan da, lehenengo partidan, VRAC taldearen aurka galtzean Valladoliden, 37-26 emaitzarekin. Oso hotz zelairatu zen atzoko norgehiagokan talde getxoztarra, eta lehen minutuan lehenengo entsegua jaso zuen. Lehen zati honetan VRAC taldea jaun eta jabe izan zen eta atsedenaldian emaitza 32-0 zen etxeko taldearen alde, talde hori-beltzeko iturriek onartu dutenez. Bost entsegu, bi transformazio eta zigor kolpe bat egitea lortu zuten valladolidtarrek. Entseguaren egileak Pedro Martín, López, Fernández (2) eta Newton izan ziren; transformatu dutenak Gorosito eta Griffiths izan ziren; eta zigor kolpea pasatzea lortu zuena Rodríguez izan zen. Lehen zati honetan baloiaren jabetza Valladolideko taldearentzat izan zen. Bigarren zatian beste aurpegi batekin zelairatu zen Getxo Artea, baina dagoeneko ezinezkoa zen norgehiagokari buelta ematea, batez ere lehen zatiaren ostean. Argazkia: © Getxo Artea Rugby Taldea.
Kostatu zitzaion talde getxoztarrari VRAC taldearen defentsa apurtzea, baina azkenean bigarren zatiko hogeitabigarren minutuan Iker Lavínek lehenengo entsegua egin zuen talde getxoztarrarentzat. Hala eta guztiz sei minutu geroago Pedro Martínek entsegu bat egin zuen etxeko taldearentzat. Hortik aurrera talde hori-beltza denetarik joan zen erasora eta azken hamar minututan Linklaterrek entsegu bat eta bi transformazio egin zituen; eta Sneek bi entsegu lortu zituen azkeneko 37-26 emaitza jartzeko. Azken minututan Getxo Artea taldea jaun eta jabe izan zen baina erreakzioa oso berandu heldu zen eta Errege Kopatik kanpo geratzen da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun