Sopelako Udalak 285.000 euro baino gehiago bideratuko ditu herriko kirol eta kultura elkarteentzat. Dirulaguntzen kopururik handiena kirol arloan esleitu dira, zehazki 176.000 euro. Tokiko iturriek zehaztu dutenez, Ugeraga Kirol Taldeak jasoko du kopururik handiena: 119.000 euro. Aipatu talde honek txirrindularitza, saskibaloia eta futbola lantzen du, besteak beste. Horretaz gain, kirol ugaritako taldeek jasoko dute dirulaguntza: mendia, igeriketa, surfa, eskupilota, triatloia, tai-jia, irristaketa, eta abar. Kulturari dagokionez, 38.000 euro bideratuko dira, eremu ezberdinetan kultur jarduerak egiteko asmoz. Aldiz, Itzartu emakumeen elkarteak 15.000 euro jasoko du. Lagun Artea nagusien elkarteak, bere aldetik, 17.500 euro. Azkenik, Lankidetza Arloan 38.200 euro xahutuko dira. Era berean, Sopelako Udalak tasak eta zergak ordaintzeko arazoak dituzten familiei zuzenduta diru-laguntza deialdia egin zuen azaroan. Diru-sail horretarako 9.200 euro banatuko da. Euskara ikasteko, aldiz, 4.200 euro bideratuko dira, eta horri gehitu behar zaio Udalak ostalari eta merkatarientzat antolatzen dituen eskola bereziak (60.000 euro). Argazkia: © Sopelako Udala.
Lankidetza Arloko diru-laguntzei dagokionez, besteak beste, 10.700 euro bideratuko dira Daira Dorako nagusien etxerako (saharar errefuxiatu kanpamenduetan), 10.000 euro Nikaraguan proiektu bat garatzeko Euskal Fondoaren bidez, Elikagaien Bankuak 4.000 euro jasoko du, eta Nuyum elkarte sopeloztarrak, 3.500 euro.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun