Amaia Barredo Eusko Jaurlaritzako Ingurumen eta Lurralde Politikako Natura Inguruneko zuzendariaren hitzetan, asko dira egunotan euskal kostaldean agertu diren aleak, eta, segur aski, Bretainiaz harago jaiotako hiru hilabeteko kumeak dira. Zientzialarien arabera, populazioa ugaritu delako edo denboraleagatik heldu dira euskal kostaldera, baina baita beste arrazoi batzuengatik ere. "Kontua da erne jokatu behar dela inguruan gertatuz gero. Kumeak dira, bai, baina animalia handi eta basak dira, egoerak izututa daudenak, eta nahigabeko disgusturen bat ekarri dezaketenak", ohartarazi du.
AMBAR elkarteko adituak ere "harrituta" daudela esan du, agertu den itsas txakur ale kopuruarekin, eta "gehiago" agertuko direla uste dute. "Asaldura eragiten du jendea laztandu edo beldurtu nahian hurbiltzen zaizkiela ikusteak. Batzuk haurrekin edo txakurrekin hurbiltzen zaizkie, baina onena, animaliak itxura ona eta egoera txarrean dagoela ez badirudi ere, bakean uztea da", gaineratu du.
AMBAR elkarteko teknikariak animaliok agertzen diren portuetara joan ohi dira, eta animalia egoera txarrean badago, foruzainekin eta Ertzaintzarekin jartzen dira harremanetan, berreskuratzeko zentroetara eramateko. "Egoera bera errepikatuko da datozen bi hilabeteetan, eta ohitu egingo bagara ere, ezbeharrak gertatzeko mehatxua hor dago. Gure esku dago horiek saihestea", azpimarratu du.
Euskal kostaldeko haitzetan edo hondartzetan itsas txakur gris kumeen aleak topatuz gero 112 larrialdietarako telefonora deitzea, —zaintzeaz eta erreskatatzeaz arduratuko diren adituak koordinatzeko—, eta ez hurbiltzea, ezta ukitzea ere, gomendatu du Amaia Barredo Eusko Jaurlaritzako Ingurumen eta Lurralde Politikako Natura Inguruneko zuzendariak, "gaixotasun eramailea izan daitekeelako eta hozka egin dezakeelako, laztanka hasiz gero". AMBAR Itsas Faunaren Ikerketa eta Babeserako Elkarteak itsas txakur grisari buruz (Halichoerus grypus) egunotan jakinarazitako aholkuak gogorarazi ditu Barredok, zetazeoen, itsas dortoken eta marrazoen kasuan ere bete behar direnak. "Gaur hil da Pasaia aldean zebilen itsas txakur gaztea, eta azterketa zehatza egingo zaio zein osasun egoera zuen jakiteko", azaldu du Barredok. Urtarrilaren 2ko gauean Lekeitioko uretatik Gorlizko Fauna Basatia Sendatzeko Foru Zentrora eramandako foka ere hil egin da, "gaixorik zegoelako", Ingurumen eta Lurralde Politikako Natura Inguruneko zuzendariaren ahotik Europa Press albiste agentziak zabaldu duenez. "Gutxienez zortzi ale dabiltza Bizkaiko eta Gipuzkoak kaietan eta hondartzetan, eta Lapurdin ere beste horrenbeste dabiltza", adierazi du Barredok. Besteak beste, hilaren 6tik 7ra arteko gauean beste itsas txakur bat ageri zen Plentziako areatzan, Arkote arraun taldeko lokaletik gertu. Argazkian, foka Plentzian / © ;@bengoetxea73.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun