Virginia Díaz Areetako Raspas del Embarcadero Arraun Taldeko arraunlaria, besteak beste, EAEko txapeldun absolutua da jarleku mugikorreko modalitatean, Espainiako txapelduna 23 urtez azpikoetan eta brontzezko domina absolutuan, eta estatuko txapelduna ergometroko arraunean. Meritu horiei esker lortu du Getxoko iazko kirolari onenaren saria. Junior kategorian, munduko txapelduna izan zen skiff modalitatean eta munduko txapelduna ergometrokoan. Espainiako hainbat Txapelketetan urrezko 11 domina, zilarrezko 5 eta brontzezko 6 lortu ditu.
Arraunlaria oso pozik zegoen eta oso hunkituta, aldi berean, jasotako sariagatik. “Egia esan, arraunak ahalegin handia eskatzen du, dedikazio handia ere. Eta harro nago horregatik saritu nautelako. Garrantzitsuena hazten jarraitzea da, hobetzen jarraitzea. Oso harro nago aurten kirolean lortutako guztiagatik. Espero dezagun motibatuta segitzea, hobetzen segitzea ”, aipatu zuen 2013ko Getxoko kirolari onena izendatzen duen saria jasotakoan.
Sari gehiago
Imanol Landa alkateak nabarmendu zuenez, “saritutako pertsonek gizarte guztiek aurrera egiteko behar dutenaren adibide onena erakusten dute. Beren talentua, lana eta hobetzeko ahalegina, kirolean garbi estimatzen diren baloreak, etorkizunean gizarte eta udalerri gisa ditugun erronkei eusteko balio eta inspiratuko diguten berberak dira”. Izan ere, Kirolaren Galan Udalak 15 sari eman zituen guztira, banakako eta urteko kirolari onenaren sariekin batera, udalerriko zenbait taldek lortutako garaipenak aintzat hartzeko, baita kirolaren alde eta kirolarentzat lan egiten duten pertsonak eta elkarteak ere. Izan ere, taldeka, “Getxo Kirol Berriak” saria eman zieten Getxoko Aixerrota BKT boleibol taldeari, emakumezkoen kategorian, bere ibilbideagatik, aipagarria baita: Euskadiko txapeldunak umeen bigarren urtean, kadeteko bi urteetan eta gazte mailako hiru urteetan. Eta mutilen kategorian, sari bikoitza izan zen, Getxo eta Arenas Club-eko gazte taldeentzat, futbolean Ohorezko Mailara igotzea lortu baitute.
“Getxo Kirol Sariak” izan dira aurten, batetik, Getxo Arrauneko neskentzat, batelen Euskadiko txapeldunorde eta Bizkaiko Liga eta Txapelketako txapeldunak direlako. Eta bestetik, mutilei dagokienez, Getxo Igeriketa Waterpolorentzat, Euskal Herriko eta Bizkaiko txapeldun absolutuak baitira, 4x50 eta 4x100eko estilo librean eta brontzezko domina Espainiako Txapelketan, 4x50 librean.
Bestalde batetik, sari bereziak honako kirolari eta talde hauentzat izan dira: “Aitzindaria”, Koldobi Etxeberria Athleticeko jokalari izandakoa. “Kiroltasuna”, kirol ibilbidea saritzen duena, Miguel Ignacio Gutierrez. 22 urtez Athletic Clubeko eta baita Espainiako Futbol Selekzio nagusiko fisioterapeuta izandakoarentzat da. “Getxo Berrituz”, berrikuntza saritzen duena, Kepa Acero surflaria, 18 urterekin Europako junior txapelduna, bere proiektuagatik, “5 olatu, 5 kontinente”. “Getxo Zabala” saria, altruismoari, Algortako Landeta Akademiarentzat izan da aurten, areto-futboleko taldeen babesle izateagatik.
Eta “Aparteko Sariak” jaso dutenak dira, batetik, Alain Goikoetxea skaterra, estiloan maisu eta Europako bowls zirkuituan kirolari garrantzitsua; eta, bestetik, Fadura Tenis Kluba, Euskadi-Nafarroa-Errioxa-Kantabriako 6 txapelketen irabazlea denboraldi berean, hainbat kategoriatan. Emaitza historikoa.
Udalerriko gizarte, ekonomia eta, batez ere, kirol esparruko 300 bat ordezkari bildu ziren atzo Algortako Fadura kiroldegian ospatutako VII. “Getxo Sasoi Sasoian” Kirol Sarien Galan. Aurten, "ospatzeko arrazoi bikoitza" duen ekitaldia izan dela adierazi dute udal iturriek. "Izan ere, kirolariek lortu dituzten garaipenak zuzen saritzeaz gain, aurten Getxo Europako Kirol Hiria izendatu dutela ospatu behar zen", azaldu dutenez. Eta gertaera garrantzitsu horrek inspiratu du aurtengo sarien leloa: “Talde bat gara”. Besteak beste, Getxoko 2013ko kirolari onenaren saria banatu zuten galan. Zortzi kirol kazetari getxoztarrez osatutako epaimahaiak, botoen %31,25arekin aukeratu zuen Virginia Díaz arraunlariaren hautagaitza. Bozketan, Koldo Larrinaga palista izan zen bigarrena, botoen %27,50arekin. Xabi López saskibaloi jokalariari izan zen hirugarrena, botoen %22,50arekin; eta laugarrena Naia Ibarrondo igerilaria, botoen %18,75arekin. Horiek guztiek Getxoko kirolaren esker ona jaso zuten. Argazkian, Virginia Díaz saria jasotzen Imanol Landa alkatearen eskutik / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun