Fisika mikrouhin labean moduluan, ikasleek fisika pixka bat "prestatuko" dute mikrouhin labean. Lehen errezetaren edo esperimentuaren bidez, mikrouhin labeen segurtasuna egiaztatu ahal izango dute, uhinek labetik "ihes" egiten duten aztertuz. Bigarren errezetan, mikrouhinean objektu metalikoak erabiltzeak dituen ondorioak behatuko dituzte. Azkenik, gomazko gozokien errezeta erraz baten bidez argiaren abiadura zehatz dezaketela ikusiko dute. Lanean hasi aurretik, komenigarria izango da ikasleek zenbait galderari erantzutea: Zer dira mikrouhinak? Nola berotzen dute mikrouhin labeek? Ura duten elikagaiak bakarrik berotzen al dituzte?
Difrakzioa, CDak eta espektroak izeneko praktikan, ikasleek argiaren uhin izaeraren alderdi interesgarri bat aztertuko dute, eta ezagutza hori etxeko materialekin (CDak edo DVDak) espektroskopio bat sortzeko erabiliko dute. Hala, mundu mikroskopikoaren propietate batzuetara gerturatu ahal izango dute.
Motor elektrikoa kapituluan, elektromagnetismoaren funtsezko lege bat landuko dute, hain zuzen ere, egungo teknologiaren motorretako bat bihurtu dena: indukzio elektromagnetikoa. Gure inguruko teknologiaren % 70 indukzio elektromagnetikoaren legean oinarrituta dagoela esan ohi da. Lege horrek aplikazio ugari ditu. Indukzio elektromagnetikoaren legea ulertzeko zenbait esperimentu aurkeztuko dizkiete ikasleei, baita garrantzi teknologiko handia duen indukzioaren aplikazioetako bat ere: motor elektrikoak. Korronte zuzeneko motorrak (edonork egin ditzake etxean, esfortzu handirik gabe) eta indukzio motorrak (esaterako, garbigailuen barnean aurki daitezkeenak; bertako ura ponpatzea dute helburu) aurkeztuko dizkiete.
Fisika hutsean moduluan, ikasleek presio atmosferikoak eguneroko objektuen portaeran duen eragina aztertuko dute. Horretarako, objektu horiek presiorik gabe, huts egoeran, duten portaera behatuko dute. Besteak beste, hutsean paper zatitxo bat metalezko bola baten abiadura berean erortzen dela ikusiko dute; baita hutsean soinua ez dela hedatzen ere (argia bai ordea). Horrez gain, airean pisu bera dutela diruditen gorputzek hutsean pisu desberdina dutela eta giro tenperaturan ura irakin daitekeela ikusiko dute.
Irratia praktikan irrati-igorle komertzial baten irrati-maiztasuneko seinale bat jaso eta haren edukia entzuteko gai izango gara, daraman informazioa atera ondoren. Beste hitzetan, "irratia entzungo dugu". Horretarako geuk eraikiko dugun zirkuitu oso sinplea, osagai gutxikoa, baliatuko dugu.
Ikasleek bost proposamenetatik hiru gauzatuko dituzte, eta, ondoren, Zientzia eta Teknologia Fakultateko fisikako ikerketa laborategi bat eta ingeniaritza elektronikoko beste bat bisitatuko dituzte.
Batxilergoko 149 ikasle ari dira parte hartzen Fisika eta Ingeniaritza Elektronikoaz Blai ekimenean
EHUko Zientzia eta Teknologia Fakultatea "Fisikaz eta Ingeniaritza Elektronikoaz Blai" egitasmoaren edizio berri bat egiten ari da egunotan. Joan zen asteartean, urtarrilak 14, hasi eta datorren asteko ostegunera arte, hilak 23, luzatuko den jarduera ludiko eta hezigarri hori Araba, Gipuzkoa eta Bizkaiko Batxilergoko ikasleei zuzenduta dago. Ekimen horren helburua ikasleengan zientzia hauenganako arreta piztea da, baita bertako instalazioak eskaintzea ere, belaunaldi berriek diziplina bi horiek egungo munduan duten oihartzunaz jabetu daitezen, EHUko iturriek adierazi dutenez. Batxilergoko 149 ikasle ari dira parte hartzen Nerea Zabala Unzalu irakasleak koordinatutako deialdi honetan. Ikasle horiek 33 ikastetxetatik etorriko dira; tartean direla Itzubaltzetako Artatza-Romo eta Algortako Julio Caro Baroja-Getxo 1 institutoak zein Sopelako Ander Deuna ikastola. Guztira 82 ikaslek egingo dute jarduera euskaraz, eta gainerakoek gaztelaniaz. Goizeko eta arratsaldeko taldetan banatuta egongo dira, eta binaka egingo dute lan laborategiko bost praktiketan. Argazkian, Zientzia eta Teknologia Fakultateak 2011n egin zuen lehendabiziko aldiz "Fisikaz eta Ingeniaritza Elektronikoaz Blai" egitasmoa / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun