Lanean jarraitzen du Sopelako Hondakinen Kontseiluak (SHK). Elkarte eta alderdi politiko ezberdinek osatzen dute, eta 2013ko martxoan sortu zenetik, hainbat egitasmo bultzatu ditu, esaterako, edalontzi eta plater berrerabilgarrien erabilera, udal iturriek adierazi dutenez. Hurrengo hilabeteetan, SHK-k hainbat proiektu sustatuko ditu, hondakinak ahalik eta ondoen kudeatzea helburu. Adibidez, formakuzioa eta hausnarketa bultzatzeko asmoz, irteerak egingo dituzte Euskal Herriko hainbat lekutara, kudeaketa modu ezberdinak gertutik ezagutzeko. Lehenengo txangoa urtarrilaren 25ean izango da, Alonsotegiko Artigaseko Ingurumen Gelara. Irteera horretan gura duten auzokideek parte har dezakete, eta horretarako autobus bat prestatu du SHK-k, debalde. Aldez aurretik izena ematea beharrezkoa izango da sopelakoudalakom[abildua]gmail.com e-postan, eta epea hilaren 24an 12:00etan edo lekuak agortzen direnean amaituko da. Argazkia: © Sopelako Udala.
Bisitariek honako gaiak landuko dituzte: sarrera (zaborraren arazoa, zer dela eta sortzen dugu horrenbeste zabor, hiru R´ak...); Artigaseko zabortegia (Artigaseko zabortegiaren funtzionamendua ezagutuko dute eta zer nolako neurriak hartzen diren ingurumen arazoak ekiditeko); eta birziklapena (birziklapenaren industria-prozesu ezberdinak). Hiru bloke horiez gain, bestelako gaiak ere landuko dira: Tratamendu Mekaniko Biologikoaren planta berriaren funtzionamendua edo kudeaketa aukera ezberdinak. Horretaz gain, hurrengo hilabeteetan beste hainbat irteera egingo ditu SHK-k, besteak beste, Zornotzara Edukiontzien Tratamendu Planta ezagutzeko, Usurbilera atez-ateko sistema ezagutzeko, Zabalgarbiko errausketa planta ezagutzeko, eta abar.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun