EHUk erakusketa interaktibo batekin gogoratuko du Albert Camusen jaiotzaren urteurrena
Otsailaren 20ra bitartean, besteak beste, Leioa eta Erandioko campuseko liburutegi nagusian ikusgai egongo da Albert Camus idazle frantsesaren bizitzari eta obrari buruzko erakusketa digitala, Euskal Herriko Unibertsitateak (EHU) antolatuta. Aipatu tokian ez ezik, ondoko guneetan ere ikusi ahal izango da: Bizkaia Aretoa (Abandoibarra, 3. Bilbo), Esperientzia Gelak (Espainiako Bankua, 2. Bilbo) eta Meatze eta Herri-lan Ingeniaritza Eskola (Rafael Moreno Pitxitxi, 2. Bilbo). Bilboko Institut Française-n eta Kulturbasque egitasmoaren arteko elkarlanaren emaitza den esposizio honek intelektual garrantzitsu horren jaiotzaren mendeurrena ospatu nahi du, EHUko iturriek zehaztu dutenez. Horretarako, Albert Camusen bizitza eta obra landuko dituen erakusketa digital eta interaktiboa izango dute eskuragarri QR kodigoa irakurtzeko gailua duten telefono mugikorren jabeek. Hartara, entzuteko eta irakurtzeko hainbat idazlan izango dira eskuragarri. Gainera, Liburutegi Nagusiak Albert Camusen hainbat idazlanen aukeraketa bat egingo du, irakasleek, ikertzaileek, ikasleek edo administrazio zerbitzuetako langileek idazle horren lanekin gozatu ahal izateko. Argazkian, Albert Camus idazle frantziarra / cc-by-sa Dietrich Liao.
Gainera, beste bi ekitaldi ere egingo dira Bizkaia Aretoan: batetik, otsailaren 10ean, Rosa de Diego EHUko Frantziar Filologiako irakaslearen "Conciencia de una generación" izenburuko hizketaldia; eta, bestetik, otsailaren 12an Camusen bizitzan oinarritutako Jean Daniel-en "Zoriontasunaren" tragedia filma ikusi ahal izango da omenaldia biribiltzeko. Albert Camus 1913ko azaroaren 7an jaio zen Mondovin, orduko Argelia frantsesean, eta I. eta II. Mundu Gerrak bizi izan zituen. "Bere bizitza eta obra XX. mendea ulertzeko ezinbestekoak dira", EHUk dioenez. 1957an Literaturako Nobel saria jaso zuen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun