Aurrera jarraitzen dute BI-634 errepide gaineko oinezkoentzako pasarela eraikitzeko lanak, Sopelan. Urtarrilaren 7an zutabeak jarri ziren lehenik eta behin (beharrezkoa izan zen garabi handi bat erabiltzea, operazio konplexu baten eraginez), eta oraingoan pasarela beraren zatiak jarriko dira. Joan den ostiralean ez ezik, udal iturriek baieztatu dutenez, behin-behineko lanak honako egun hauetan ere izango dira: hilaren 22an (bihar), 23an (etzi), 29an (asteazkena) eta 30ean (osteguna); lanek BI-634 foru-errepidean eta Loroño kalean eragina izango dute. Operazio konplexuen ondorioz, errepidea moztu beharko da egun horietako une batzuetan, eta trafikoa Akilino Arriola kaletik bideratuko da. Egunik konplikatuenak urtarrilaren 29a eta 30a izango dira. Loroño kalea itxita egongo baita egun horietan, tokiko arduradunek iragarri dutenez. Udalak espero du lanek auzokideei ahalik eta kalte gutxien sortzea. Argazkia: © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun