Edukiontzi marroia erabiltzeko tresnak banatzen dabiltza Gorlizen eta Erandion

Egunero etxeetan eta saltokietan sortzen diren hondakin organiko konpostagarriak botatzeko edukiontzi marroiak jarriko zituela kaleetan iragarri zuen 2013ko irailaren bukaeran Gorlizko Udalak. Hori erabiltzeko asmoa jakinarazi duten herritarrek gaur batu ahal izango dituzte ontzia, birziklatze poltsak, edukiontzi marroiak zabaltzeko giltza, eta abar. Hitzordua 19:00etan izango da, Sertutxena eraikinean. Udal iturriek zehaztu dutenez, bertan emango zaizkie argibideak gorliztarrei: edukiontzi marroian zer bota daitekeen eta zer ez, non egongo diren... Halaber, aurrerantzean erabiltzen animatzen direnek kultur etxean, Sertutxenan, turismo bulegoan edo udaletxean joso ahal izango dituzte tresnak. Bitartean, Erandion, informazio bilerak egingo dituzte auzoz auzo eta bertan jaso ahal izango da "organikoaren kit"-a. Udal iturriek zehaztu dutenez, "etxebizitza bakoitzeko kit bana banatuko zaie Erandion erroldatuta dauden herritarrei, horiek agortu arte". Batzarrera joango direla baieztatzeko 900 866 963 (10:00etatik 17:00etara) telefono zenbakira deitu beharko dute herritarrek. Hurrengo hitzorduak ostiral honetan, urtarrilak 24, jarri dute Astrabuduko Josu Muruera kultur gunean, 17:00etan, 18:30ean eta 20:00etan. Argazkia: © Erandioko Udala.