Abortuaren Legearen erreforma salatuko dute bihar eskualdeko gizon-emakumeek

Erabiltzailearen aurpegia Ukberri 2014ko urt. 23a, 13:02

Espainiako Gobernuak abenduaren 20an onartu zuen Abortuaren Legea aldatzeko aurreproiektua. 1985ko legea baino atzerago eginez, baldintzak erabat gogortu nahi ditu Madilgo exekutiboak, eta abortatzeko zirrikituak mugatuko ditu. Bi izango dira baldintzak: bortxaketa bat jasan izana, edo haurdunaren osasun fisikoari edo psikikoari kalte larria eragitea. Malformazioak ez dira zuzenean abortatzeko arrazoi izango. Horren aurrean, ez dira gutxi orain arte izandako kontrako adierazpenak eta mobilizazioak. Oraingo honetan, Uribe Kostako Koordinadora Feministak deitu du eskualde mailako manifestazioa. Ostiral honetan, urtarrilak 24, Itzubaltzeta / Romotik irten eta Areetan zehar egingo dute martxa, 19:30etik aurrera, "Gure gorputza, gure erabakia. Abortuaren kontrako legerik ez!" lelopean. Hilaren 28ko Getxoko udal batzarrera begira, berriz, mozioa aurkeztu dute: "Udaleko talde politikoei eskatuko diegu Espainiako Gobernuari abortuaren kontrako legearen aurka jartzeko eta bertan behera uzteko eta emakumeen eskubideak eta bizitza defendatzeko exijitzeko", adierazi du eragile feministak. Argazkian, martxoaren 8ko manifestazioa Algortan.

Uribe Kostako Koordinadora Feministak zabaldutako oharra:

"Gure gorputza, gure erabakia. Abortuaren kontrako legerik ez!"

Espainiar Gobernuak eraso gogor, etengabe eta iraunkorrari ekin zion aspaldi, PP gobernura heldu denetik hartutako neurri guztiek beste inori baino gehiago emakumeoi eragiten digutenez gero, hasi lan-erreformak, segi mendetasun- eta zaintza-legeak, hezkuntza-erreforma eta dekretuak, eta urte amaierako “oparia”, abortua debekatu eta zigortzeko ekimena. Aipatutako urrats horiek guztien helburua argi dago, gure ustez: patriarkatuaren eredua, kapitalismoaren eredua betikotzea eta, ondorioz, emakumeok bigarren mailako herritar izatea, etxe eta familia ardurak gure gain hartzera behartzea eta abar. Horrela, azken finean, emakumeok ez gara sekula aske izango, pertsona helburu baino dirua helburu duen egituraren sostengua baizik, inolako erabakimenik gabe. Ez gaituzte gure gorputzen, gure sexualitatearen, gure ugalmenaren jabe nahi, emakumeon gorputza, gogoa eremu politiko bihurtu dute, emakumeoi multzo zein norbanako gisa dagozkigun erabakiak hartzeko aukera ukatuz. Abortuaren kontrako legearen aurreproiektuak ere argi eta garbi erakusten digu noraino joateko kapaz diren, eta ez dutela emakumeon zapalkuntzan atzera egiteko asmorik. Zer egingo dute hurrengo aurre egin eta geldiarazten ez baditugu? Argazkian, martxoaren 8ko manifestazioa Algortan.

Haserre gaude bai. Min ematen diguzue egunero pairatzen dugun indarkeriarekin, hitzez eta ekintzez egiten diguzuen kaltearekin, edonon jasan behar ditugun eraso zuzen zein zeharkakoekin, gure kontrako egiturazko indarkeria elikatzen eta baliatzen duen jendartearekin. Eta ez dugu etxean besoak gurutzatuta etsita eta amore emanda geratzeko asmorik. Ez horixe!

Antolatu, erantzun, saretu, elkarri informazioa eta laguntza eman, erasoei aurre egin, ez etsi eta borrokatzen segitzea erabaki dugu. Gure esku ere badago gauzak aldatzea, kontzientzia hartu eta dugun ahalmenaz jabetzea. Eraiki dezagun emakume libreen lurraldea egunero, gure eskubideen aldeko harresiak altxatuz.

Uribe Kostako talde feministak elkartu eta urtarrilerako hainbat protesta-ekintza antolatu eta deitu ditugu, besteak beste:

Urtarrilaren 24an, ostirala, 19:30ean manifestazioa egingo dugu Itzubaltzetatik irten eta Areetan zehar.

Urtarrilaren 28an, mozioa Getxoko Udalean. Udaleko talde politikoei eskatuko diegu Espainiako Gobernuari Abortuaren kontrako legearen aurka jartzeko eta bertan behera uzteko eta emakumeen eskubideak eta bizitza defendatzeko exijitzeko.

Saiatuko gara gainerako herrietan ere mozioak aurkezten. Adi egon zaitezte deialdietara eta zatozte gurekin, emakume eta gizon, etorkizunak gurea behar du.

Itzubaltzetako Emakumeen Asanblada, Algorta eta Leioako Bilgune Feminista, Erandioko Emakume Taldea...
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun