Eudelek eta Eusko Jaurlaritzak udaletara bidalitako gutun bateratua:
Euskadiko udalei zuendutako gutuna: Euskal Autonomia Erkidegoko ikur frankistak kentzeko Batzorde Teknikoa gomendio Irizpena
Abenduaren 26ko 52/2007 Legearen “Ikur eta monumen tu frankistak” 15. artikuluan ezarritakoa betetze aldera, 2012an, Eusko Jaurlaritzako Giza Eskubideen Zuzendaritzak “Gerra Zibila eta diktadura goresten dituzten Euskadiko ikur eta monumentu publikoen katalogoa” egiteko agindu zuen (aipatu legeak eskubideak aitortzen eta handitzen ditu, eta neurriak ezartzen ditu Gerra Zibilean eta diktaduran jazarpena edo indarkeria nozitu zutenen alde). Katalogo horretan, Euskadiko hainbat udalerritan oraindik ere ageri diren ikurren kokalekua zehazteaz gain, katalogatutako ikurren jatorria eta helburuen berri ematen da.
Azterlan horrek egiaztatu zuen, bada, Euskadiko udalerrietan oraindik ageri direla era horretako ikurrak. Horrenbestez, Eusko Legebiltzarrak eskatu zion Giza Eskubideen Zuzendaritzari katalogo hori EUDELen eskura jartzeko eta euskal udalerrien elkarte horrekin batera «Euskadin ikur frankistak kentzeko Batzorde Teknikoa» eratzeko (Memoria Historikoaren Legean aipatzen den errolda egiteari buruzko 28/2011 Legez besteko proposamenaren bitartez egin zion eskaera hori).
Bost teknikarik osatu zuten batzordea, horietariko bi euskal udalerrietako ordezkariak zirela. Batzordearen xedea izan zen, alde batetik, katalogoa aztertzea, eta, bestetik, gomendio sistematizatuak biltzen dituen Irizpen bat egitea, erakunde publikoei zuzentzeko, Euskadin ageri den diktadura frankistaren garaiko sinbologia kentze aldera.
Hemen dago eskuragarri aipatu irizpena, ikur frankistak kentzeko jarraitu beharreko gomendioak biltzen dituena: https://euskadi.net/r47-contmh2/eu/contenidos/informacion/retirada_simbolos_franquistas/eu_dictamen/adjuntos/Dictamen_retirada_simbolos_franquistas_eu.pdf
Orobat, katalogoari zein irizpenari buruz edozein galdera egiteko edo informazio gehiago eskatzeko, Eusko Jaurlaritzako Biktimen eta Giza Eskubideen Zuzendaritzara jo daiteke, helbide honetan: derechos-humanos[abildua]ej-gv.es
Horren berri ematen dizugu, behar dituen ondorioak izan ditzan.
Gasteizen, 2014.ko urtarrilaren 16a
Plentziako udaletxeko bilkura aretotik frankismo garaiko zazpi alkateen (1937tik 1979ra) erretratuak erretiratu ditzaten, Arartekora joko zuela iragarri zuen joan den astean Bilduk, udal agintariek beraien "eskaerei jaramonik egin ez" dietelako. Jose Daniel Lacalle Larraga militar eta hegazkinlari kolpistari eta Francoren Aireko ministroa izandakoari zein Fernando Ibarra López-Dóriga Bizkaiko Foru Aldundiko presidente eta Getxoko alkateari emandako urrezko dominak ere barne hartzen ditu eskakizunak. Isamari Zarauza alkate independenteak "El Correo Español" egunkariari adierazi zionez, ordea, irudiok kentzea "gure iraganaren zati bat ezabatzea" litzateke. Bere iritziz, "udalerriaren mesederako pertsona horiek egindakoa ere kontuan hartu beharko litzateke". Hala ere, "behin betiko erabakia hartzeko" Arartekoaren erantzunaren zain dela esan zuen Zarauzak. Bada, lehen aipatu egunkariak albistea zabaldu eta hurrengo eguneko data dauka Eudelek eta Eusko Jaurlaritzak udaletara bidalitako gutun bateratua; ikurrekin zer egin erabakitzeko aholku sorta emanez. Argazkian, alkateen irudiak Plentziako udaletxean / © Plentzia, Gorliz eta Lemoizko ezker abertzalea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun