Hori, guzti hori, oso larria da, baina are larriagoa bihurtzen da, diru horren parte bat Kortiñeko (Andra Mari) lurren salmentatik ateratako 2,5 milioi euroak direnean. Herritarronak ziren lur horiek, saldu egin dira bertan gutxiren eskura egongo den etxebizitza librea egiteko. Diru hori, Udalaren Lurzoru Ondare-rako boltsara joan eta benetan soziala den etxebizitza politikara bideratu behar bada ere, EAJk lotsa barik onartzen du nahiago izan duela 2,5 milioi euroak Getxo Antzokiko munstroa elikatzeko bideratzera. Bitartean, ez du inolako etxebizitza politikarik, ez etxe hutsen inguruan ezta alokairuzko etxebizitza parke soziala sortze aldera ere.
EHBildutik jarraituko dugu egoera hau salatzen (gaur bertan, urtarrileko Osoko Bilkuran) eta dei egiten diegu herriko elkarte zein banakoei jada abiatutako borrokak indartzera zein berriak abiaraztera, EAJk udal diru eta ondasunekin eramaten duen politika salatzeko.
Getxoko EHBildu
Getxoko EHBildutik onartezina eta oso-oso larria deritzogu beste behin ere EAJren Gobernu Taldeak herritarren diruarekin egiten ari denari. Getxo Antzokian eta Itzubaltzeta-Romoko Kultur Etxean orain arte utzitako 40 milioi euroak gutxi balira, urtarrilean (Komisiora zein Plenora eramanez) beste 4 milioi euro baino gehiago erraztuko dituzte Getxo Antzokiaren gastua oraindik gehiago biderkatzeko. Hori oso larria da, inposaketaz eta handinahikeriaz egindako proiektu hauei buruz oraindik EAJk ez duenean inolako bideragarritasun txostenik aurkeztu (ez dagoelako) eta, hala ere, Getxoberrin behin eta berriz saldu duenean proiektu hauetan “dirua aurrezten” ari zela. Aurreztu zertan? Kontuen Euskal Epaitegiaren txostenean ikusi ahal izan dugu zelan Getxo Antzokiko obren prezioa diru kopuru batean aurkeztu eta ondoren biderkatu egin dutela esleitzerako orduan (Getxo Antzokiaren obra-zuzentzea %86an handitu zen). Aurreztu zertan? Orain lau milioi euro baino gehiago bideratzen direnean horretara BEZ eta IRPF igoerak aitzakiatzat jarriz? Aski ezaguna da, faseka zatikatzea eta bestelako azpijoko “legal” erabili dituela EAJk makro-proiektuak elikatu eta herritarron diruarekin jolastu ahal izateko. Argazkian, Getxoko Bilduk Udalean emandako bi urtetako balantze publikoa egin zuen 2013ko ekainaren 11n, Algortako San Nikolas plazan, Getxo Antzokiaren edo "EAJren proiektu megalomanoaren" aurrean / cc-by Getxoko Bildu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun