Olatu handiengatik atzotik indarrean dagoen alerta laranjari eutsi dio gaur Eusko Jaurlaritzako Larrialdiei Aurre Egiteko eta Meteorologiako Zuzendaritzak. Iragarpenek arabera, arratsaldean olatuak sei metro baino gehiagokoak izan daitezke, baina azken orduetan lauzpabost metro ingurukoak izango dira. Asteazkenean, itsasaldeko arriskua txikiagoa izango da, lauzpabost metroko olatuak aurreikusi baitituzte, eta abisu horia izango da indarrean. Hain justu, itsaso zakarrak hildako bat utzi du gaur, Ondarroan. Gizonezko bat zendu da olatu kolpe batek itsasora bota eta gero.
Olatuen arriskua dela eta alerta laranja ezartzeaz gain, abisu horia ezarri du Jaurlaritzak haizeagatik. Euskalmeten iragarpenaren arabera, haize-boladak 100 km/h-koak izango dira haizeguneetan eta 80 km/h-koak gainerakoan, batez ere Bizkaian eta Araban.
Algortako Ereaga hondartza alboko Ola jatetxetik Portu Zaharrerako bidea moztu du Getxoko Udalak, meteorologia-egoera hobetu arte, Eusko Jaurlaritzaren Larrialdiei Aurre Egiteko eta Meteorologiako Zuzendaritzak itsasaldeko arriskuagatik alerta laranja ezarri ondoren. Gainontzeko arrisku tokiei dagokienez, Ereagako moila eta Ereagatik Portu Zaharrerako bidea kontrolatuko dituzte etengabe eta, olatuen baldintzek txarrera egingo balute, horiek ere itxi egingo lituzkete. Halaber, Gasteizko Gobernuak zabaldutako gomendioak betetzea eskatu du tokiko erakundeak. Prebentzio neurrien artean hurrengoak gomendatzen dira: haize zakarrengatik olatuek eta marea biziek eragina eduki ditzaketen tokietara ez hurbiltzea; itsasontziak ez erabiltzea eta beren loturak begiratzea; itsas kirolik ez praktikatzea eta kostaldearen ondotik doazen errepideetatik ez ibiltzea. Larrialdietan, 112 zenbakira edo Getxoko Udaltzaingoaren 944 660 202 telefonora deitzea eskatu dute. Argazkian, 2009ko urtarrilaren 24an, zikloi batek jota, Sapaburu itsas-ontzia hondoratu zen Areetako Bola hondartzaren ondoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun