Sopelako Udalak gaineratu duenez, "hainbat talde politikok horrela eskatuta", espediente bat ere badago tokiko bi polizien aurka, 2012ko uztailaren 15ean eta 17an hainbat hedabidek plazaratutakoaren gainean, agertutakoa "ezkutuko informazioa" zelakoan. Instrukzioko epaitegiak udaltzainek operazio-azpiofizialaren kontra aurkeztutako salaketa ebatzi artean geldirik egon omen da aipatu espedientea. Azkenean salaketa artxibatu egin du epaileak. "Hala ere, prentsan agertutako datu horietatik ondorioztatu beharko da disziplinazko prozedurarekin jarraitu beharko den ala ez", esan dute agintari sopeloztarrek. Hori dela eta, "arinkeriaz" jokatzea ez ezik, aipatu bi polizien "errugabetasun presuntzioa ahaztea" leporatu dio Udalak ELAri, "biak zigortutako langileen zerrendan sartzeagatik".
Amaitzeko, agintaldian zehar beste bi prozedura zabaldu zituztela jakinarazi du Gobernu Taldeak: bata, udaltzain baten kontra, ustez tresna informatikoak "behar ez bezala" erabiltzeagatik. Eta bestea, hainbat tokiko polizien aurka, 2012ko EAEko hauteskundeen egunean lanera agertu ez zirelakoan eta hori azaltzeko egiaztagiria aurkeztu ez zutelakoan. Hala ere, horiek guztiak bertan behera utzi behar izan zituzten gertaerak edo horien egileak zeintzuk ziren frogatu ezin izan zutelako.
Espedientea zabalik duten langileak hiru direla erantzun dio Sopelako Udalak ELAri
ELA sindikatuari erantzunez, tokiko langileen kontra abiarazitako disziplinazko prozedurak hiru direla adierazi du Sopelako Udalak. Halaber, horien helburu bakarra "zerbitzu publikoarekin bateragarriak ez diren jokabideak zigortzea" dela zehaztu dute agintariek, Sopela.net agerkari digitalak plazaratu bezala. Batetik, udaltzain bati diziplinazko espedientea zabaldu zioten, komisarian tiro batek ihes egin ziolakoan. Bestalde, Saioa Villanueva alkatearen sinadura bost lan kontratutan faltsutzea leporatzen diote beste behargin bati. Kasu horretan, "ekinbide judizialak amaitu artean geldirik dago espedientea, gertaerak delitu izan daitezkeelakoan". Azkenik, falta arinagatik ohartarazpena egin zioten udal teknikari bati. San Pedro jaietako su artifizialetan Segurtasun Plana ez betetzea eta Eusko Jaurlaritzak horren gaineko arau-hauste akta egin zuela alkateari ez jakinaraztea egozten diote horri. "Horrek 30.000 eurora hel daitekeen isuna ekar diezaioke Udalari eta, ondorioz, sopeloztarrei", aipatu dutenez. Alkatetzaren hitzetan, "horrelako jokabideak ez zigortzea litzateke arduragabekeria". Bestalde, Udalean ordezkaritza daukan sindikatu bakarra ELA dela nabarmendu du Sopela.net agerkariak. Argazkian, udaletxea / © Sopelako Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun