Saharara eramateko elikagaiak bilduko dituzte bihar eta etzi Artea merkatalgunean
Sopelako Nuyum elkarteak bezala, Atfal taldeak, Getxoko Udalaren laguntzarekin, jakiak eta produktu higienikoak biltzeko ohiko kanpaina eramaten ari da aurrera, Fronte Polisarioak, Euskal Fondoako Sahararekiko koordinazio Unitateak eta saharar herriarekiko elkarte solidarioek antolatutako Sahararen aldeko Euskal Karabanarako. Horretarako, bihar arte, jaki ez galkorrak bilduko dituzte, horien artean, arroza, atuna oliotan, azukrea, pasta, sardinak oliotan eta lekaleak, eta produktu higienikoak, konpresak eta helduentzako oihalak. Produktuak ikastetxeetan batzen ari dira; baita telefonoz (658 751 359) abisatu ondoren Atfal elkartearen egoitzan ere, Algortako Karitate kaleko 1ean dagoen Aldai Patronatoan. Gainera, Atfalek produktu horiek Artea merkatalguneko hipermerkatuaren aurrean batuko ditu, bihar, 16:00etatik 22:00etara eta, etzi, 09:00etatik 22:00etara. Argazkian, ordezkari politiko getxoztarrak Sahara eta ekialdeko Europako umeei ongi etorria ematen udaletxean.
Kanpainaren helburua Tindouf-eko (Aljeria) errefuxiatu kanpamenduetan bizi diren lagunei elikagaiak bidaltzea da, ahal den neurrian pairatzen duten elikadura-krisia arintzeko. Kepa Miñambres Llona Lankidetza zinegotziak espero du “aurrekoetan bezala, getxoztarrak bereizten dituen elkartasunezko izaerari esker emaitza ezin hobeak lortzea, errefuxiatu sahararrek kanpamenduetan egunero pairatzen dituzten jakietako baldintza txarrak arintzea ahalbideratuko dutenak”.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun