Antolaketan Salto! sexu askapenerako gazte mugimenduaren eratze prozesua Uribe Kosta eskualdera iritsi da. Asteak eman ditu lantalde batek eztabaidan, beharrak identifikatzen eta Hego Euskal Herrian eratze prozesuari ekarpenak egiten. Orain, beste eskualdeetako kideak egin duten bezala, Uribe Kostan ere asanblada sortzeko dinamika sorta plazaratu nahi dute. Gaur, osteguna, “Mi sexualidad es una creación artistika” dokumentala ikusteko aukera izango da Algortako Eztabaida gune antiautoritarioan, 19:30ean. Otsailaren 8an, berriz, Erandion ospatuko dute jaialdia. Lehenik eta behin, 19:30ean trikipoteoa izango da udaletxetik hasita elizaraino, "zarata sortzeko asmoarekin". Gero, 22:00etan, Kalezulo gaztetxean, Las Fellini eta D-lirios Dj.aren ikuskizuna egongo dira, gau osoan zehar. Azkenik, hilaren 15ean, tupper-sex parte hartzailea iragarri dute Sopelan. Argazkia: cc-by-nc Erprofe.
"Dinamika hauen helburua, eskualdean sexu askapenerako gazte mugimenduaren eratze prozesuari bultzada ematea da; jaia eta ekintza politikoa nahastuz. Uribe Kostako gazteak inplikatu nahi ditugu gure gorputzen eta identitateen burujabetzaren aldeko borroka iraultzaile honetan. Estatuak, gainontzeko guztia kontrolatzeko, gu kontrolatu behar gaituelako lehenik eta behin. Gure gorputzak, sexualitateak eta identitateak arma politiko bihurtuz, heteropatriarkatua aztoratzea dugu helburu; kapitalismoari, faxismoari, heterozentrismoari... gatazkara behartuz. Hori lortzeko eman beharreko lehenengo urratsa, sexu askapenerako gazte erakunde indartsua sortzea da, eskualdean ere. Horrenbestez, Uribe Kostako gazteei proiektu honetan murgiltzeko deia luzatzen diegu, dinamika hauetan parte hartzen eta etorkizunean ere erakundeari itsura ematen", azaldu dute Uribe Kostako sexu askapenerako gazte mugimenduko kideek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun