Aurretik, Erandioko Hegoalde, Astrabuduako Egoki, Leioako Kurkudi, Itzubaltzeta / Romoko Branka, Algortako Gorrondatxe, Sopelako Mikelats, Berangoko Sei Herri eta Urduliz Iretargi herriko tabernetatik igaroko dira. Izan ere, 35/02 eta 26/11 sumarioen barruan, Espainiako Auzitegi Nazionalean epaituak izaten ari diren 110 elkarteak eta 76 euskal herritarrak "libre uzteko" aldarrikatzea izango da mobilizazioaren helburua. 35/02 auziari dagokionez, akusatuen artean dira Jose Luis Franco zein Maite Amezaga algortarrak, Galdakaon bizi den Izaskun Barbarias urduliztarra, Karmelo Landa Leioa eta Erandioko campuseko Literatura irakaslea eta hainbat urtez Getxoko Udalean lan egin eta PPk bertatik kaleratu nahi izan zuen Sabin del Bado sondikarra.
Ondorengo manifestua irakurri dute pertsona ezagunek gaurko agerraldian:
Zubiak eraiki nahi ditugu lehen harresiak zeuden lekuan. Gurea bando herria izan da. Identitatearen inguruko bateko eta bestekoena, ideologiaren araberakoena... eta garaile eta garaituena, “eurak” eta “gu”, betiro. Baliteke, oraindik ere, hala izatea neurri batean. Baina bi urteko prozesu demokratikoaren ostean, subjektu berri bat sortu da, “gu” berri bat; gu, bakean eta justizian oinarrituko den etorkizun berri baten alde egiten dugunak, konfrontazioa eremu politiko hutsera mugatuko den etorkizunaren jabe izan nahi dugunak; denok irabazle izango garen etorkizuna.
Etorkizunerako zubiak. Atzera begirako estrategia “antiterrorista”-ri lotzea herri honen etorkizunaren eraikuntzarako zama latza da. Eragile politiko eta sozial orok eman du urratsen bat denok batera ekin behar diogun etorkizuna eraikitzeko. Gehiago beharko dira, baina agerikoa da lekuz kanpo daudela konponbidea eten edo oztopatu asmoz eraikitzen dituzten harresi berriak, eta epaiketa hau horietako bat da, garrantzitsua gainera. Garaiz eta lekuz kanpo dagoen anakronismoa da.
Ilusio zubiak. Epaiketa hau, antzeko beste ekinbide batzuen antzera (edo estrategia beraren baitan egiten ez diren urratsen moduan) frustrazio eragile da. Herritarrok ilusio desioz gaude, ordea, bakean eta justizian oinarrituko den etorkizuna eraiki nahi dugu, errespetua eta aitorpena oinarri izango dituena.
Justizia zubiak. Bada arrazoibide eta tresna juridiko aski epaiketa honen emaitza bakearen aldeko urrats txiki bat izan dadin. Justizia, garai berri baterako trantsizio ikuspegitik aplikatzen hasi behar da. Gure aurkako epaiketan berez delitu ez diren ekimenak aurkeztu ditu akusazioak froga gisa, hala aitortu du, gainera; helburuak dituzte epaitzen, ez bitartekoak, jardun politikoa dute epaitzen eta ez delituak. Egungo testuinguruan, politikak irten egin behar du eremu polizial eta juridikotik.
Horregatik guztiagatik, adierazpen honetan prozesu judiziala bertan behera uztea eskatzen dugu, edo auzipetu denak absolbitzea edo egokien den modua, baina 40 gazte hauek libre nahi ditugu.
Bideo hau sareratu dute atxikimendua eman duten kideek ondorengo testua irakurtzen dutela
40 gazte epaituen askatasuna aldarrikatu dute beste horrenbeste pertsona ezagunek
26/11 sumarioen barruan epaitzen ari diren 40 gazte independentistei atxikimendua adierazi diete gaur joera politiko ugaritako beste horrenbeste pertsona ezagunek. Neska-mutil bakoitzarentzat seina urteko espetxe zigorra eskatu du fiskalak, Segi gazte erakunde ilegalizatutako kideak izatea egotzita, tartean Xabier de la Maza Peña gorliztarra dela. Urrian hasi zen epaiketa amaitzear da egunotan Espainiako Auzitegi Nazionalean. Hori dela eta, gaurkoan agerraldia egin dute Bakartxo Ruiz Bilduko politikaria, Mikel Astarloza txirrindularia, Alaia Martin bertsolaria, Mikel Labaka futbol jokalari ohia eta Sabino Cuadra Amaiurreko diputatuak; 40 pertsonalitateren izenean, garai berriei dei eginez, gazteak aske uzteko eskatzeko. "Adierazpen honetan prozesu judiziala bertan behera uztea eskatzen dugu, edo auzipetu denak absolbitzea edo egokien den modua, baina 40 gazte hauek libre nahi ditugu", adierazi dute. Uribe Kosta eskualdea gerturatuz, larunbat honetan (otsailak 1) martxa bana abiatuko da goizeko 10:30ean, Erandio (bizikletaz, eguraldiak uzten badu) eta Gorliztik (kotxez). Biak ala biak Algortan elkartuko dira, 13:30ean, Telletxe plazan, "Libre! Epaiketa politikorik ez!" lelopeko eskualde mailako manifestazioa egiteko. Argazkian, gazteen kontrako epaiketa salatzeko urriaren 14an Gorlizen egindako mobilizazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun