Bitartean, Getxoko Udalak lehen aipatu tokien inguruko ostalaritza eta merkataritzako establezimenduetako arduradunei aholkatu die prebentzio neurriak hartzeko. Prebentzio neurrien artean hurrengoak gomendatzen dira: haize zakarrengatik olatuek eta marea biziek eragina eduki ditzaketen tokietara ez hurbiltzea; itsasontziak ez erabiltzea eta beren loturak begiratzea; itsas kirolik ez praktikatzea eta kostaldearen ondotik doazen errepideetatik ez ibiltzea. Larrialdietan, 112 zenbakira edo Getxoko Udaltzaingoaren 944 660 202 telefonora deitzea eskatu dute.
Iragarpenak
Segurtasun Sailak alerta laranja ezarriko du berriro larunbat arratsaldean, sei metro baino gehiagoko olatuak izan daitezkeelako. Gainera, igande goizaldeko 03:00etatik 09:00etara alarma gorria piztu dute kostan, olatu handiengatik. Gaurko ez dago abisurik, baina, bihar goizean, olatuak lau metrokoak izango dira. Arratsaldean, arriskua handiagoa izango da, eta olatuak bost eta sei metro artekoak izango dira 15:00etatik aurrera, gauerdira arte.
Itsasaldeko arriskuagatik eta olatuen altueragatik, alerta laranja eta alarma gorria eman ditu astebururako Eusko Jaurlaritzaren Larrialdiei Aurre Egiteko eta Meteorologiako Zuzendaritzak. Besteak beste, igandean, 03:00etatik 09:00etara, zazpi metrora hel litezke olatuok. Hori dela eta, Imanol Landa Getxoko alkateak Larrialdi Plana, 0 fasean, eta Krisi Mahaia jarri ditu indarrean. Ondorioz, Babes Zibilak bihar, 15:00etatik aurrera, itsasotik gertu dauden hainbat tokitarako bideak moztuko ditu. Hain zuzen ere, oinezkoak ezin izango dira Algortako Ereagako moila osotik ibili, ezta bertoko pasabidetik (Turismo bulegotik Portu Zaharreraino) zein Getxoko Arrigunaga eta Azkorriko hondartzetatik ere. Halaber, ibilgailuak ezin izango dira Ereagako igogailutik Portu Zaharrerantz joan; eta Portu Zaharreko horma ere zaintzapean izango dute, pertsonak igaro ez daitezen. Era berean, prebentzio neurriak areagotuko dituzte larunbatetik iganderako goizaldean: oinezkoei ez zaie pasatzen utziko Kirol Portura eta Ereaga, tokiko iturriek zehaztu dutenez. Sopelako Udalak ere herritarrei kostaldean arreta handiz ibiltzea eskatu die, eta Meteorologia Zerbitzutik eskaintzen diren alertei adi egotea. Argazkian, 2010eko azaroaren 9an, goizaldean, Kantauri isurialdea jasaten ari zen denborale gogorrak hainbat kalte eragin zituen Ereagako pasealekuan / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun