Getxoko udal teknikariak ekaitzak eragindako kalteen inguruko behin behineko balorazioa ari dira egiten: "kaltetutako elementuen kopurua eta kalteen zenbatekoaren kalkulua ezin izango dira ezagutu, garbiketa lanak zein behin betiko azterketa lan guztiak amaitu arte", esan dute. Turismo bulegoa, sorospen-postua eta komun publikoak dauden udal eraikina garbitu dute dagoeneko, olatuek "ukituta" utzi eta gero. Turismo bulegoan, ura eta harea jendeari arreta eskaintzeko gunean eta biltegian sartu dira, kalte txikiak eraginez. Halere, eraikineko kanpoaldeko hormatxoa, hondartzara begira dagoen beiratea eusten duena, mugitu egin da uraren indarraren ondorioz. Udal teknikariak kalte horren garrantzia ari dira aztertzen.
Larrialdi plana indargabetuta
Aipatu, azkenik, Imanol Landa Getxoko alkateak Larrialdi Planaren 0 fasea eta Krisi-Mahaia indargabetu dituela. Joandako ostiralean deitu zituen, Larrialdiei Aurre Egiteko eta Meteorologiako Zerbitzuak itsasaldeko arriskua/olatuen altueragatik indarrean jarritako alerta laranja eta alerta gorria zirela eta.
Euskal kostaldea, Getxo udalerria barne, batez ere igande goizaldean astindu duten olatu handiek Algortako Ereaga hondartzako pasealekuko horman, zenbait zatitan, eta Portu Zaharrekoan, zati bakar batean, kalteak eragin dituzte. Guztira 40 metro inguru eraitsi ditu itsasoak, udal iturriek egindako balorazioaren arabera. Halaber, gune horretako hiri-altzariak (3 banku, 17 metro baranda metaliko, zenbait kutxatila eta baldosak), eta Kirol Portuko bi farola, kaltetu dituzte olatuek. Garbiketa-talde berezi batek lanean jarraitzen du atzo goizeko lehen orduaz geroztik, hondarrak, harkaitzak, harriak, enborrak, adarrak eta olatu handiek pasealekura ekarritako hondakin guztiak kendu eta garbitzen. Turismo Bulegoa ere kaltetu dute, ura eta harea sartu dira barrura, baina dagoeneko zabalik dago jendearentzat eta arreta zerbitzua normaltasunez eskaintzen, tokiko arduradunek adierazi dutenez. Eraitsitako horma zatiak zein kaltetutako hiri-altzariak garbiketa lanak amaitutakoan hasiko dira konpontzen. Uribe Kosta eskualdeko beste hainbat lekutan kalte txikiak eragin dituzte olatuek. Bestalde, Erandion, itsasadarrak gainezka egin zuen larunbatean B-711 errepidea urez betez. Argazkian, Ereaga hondartzako kalteetako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun