Gernikako Batzar Etxean dagoen haritzaren ezkur batetik sortutako kimua da EHUn landatu den "quercus robur". Zuhaitz gaztearen ondoan plaka bat jarriko da, eta bertan, honako hitz hauek agertuko dira euskaraz, gazteleraz eta ingelesez: "Bizitzaren Arbola, Euskal Herriko Unibertsitatearen ikurra, Eduardo Chillida eskultoreak sortu zuen, Iparragirreren olerki batean oinarri hartuta. Ikurrak, mundura zabaltzen den fruitu emankorra irudikatzen du. Gernikako haritzaren altsuma hau, euskal askatasunen sinboloa ere badena, 2014ko otsailaren 3an landatu zuen Iñaki Goirizelaia UPV/EHUko errektore jaunak, campus honetarako sarrera buru izaki, nazioartearekiko bokazioaren lekuko".
Ekitaldian zehar, Ana Madaiaga Bizkaiko Batzar Nagusietako presidenteak gogora ekarri du Luis Maria Leizaola lehendakaria: "Gaur sartu dogun landara honegaz, bada, zelanbait itxi egiten dogu 1922. urtean hasi zan ibilbidea. Urte haretan, Gernikako Batzarretxetik hur, Gernikako Uribilduan, Eusko Ikaskuntzaren III. Kongresua egiten egozan. Bertan izan zan Leizaola gaztea euskal unibertsitatearen aldarrikapena egiten Alfonso XIII Erregeren aurrean, Arbola Sainduaren ondoan pankarta bat jarrita. Atxilotu eta esku-burdinakaz eroan eben Bilbora. Urte batzuk beranduago, Gerra Zibilean, Agirreren Gobernuko Kultura sailburua zala, gauzatu eban gauzatu aspaldian aldarrikatzen eban hori, eta Euskal Unibertsitatea abiarazo eban; ekimen aitzindaria, eskultura horretan gogorazoten dana".
EHUko errektoreak, bere hitzaldian, euskal unibertsitatearen logotipoak bere baitan gordetzen dituen bi sinboloak gogoratu ditu: zientziaren zuhaitza eta Gernikako Arbola. "Elkarketa sinboliko hori, gainera, unibertsitateko eguneroko errealitatean gauzatzen da: hemen sortzen da ezagutza, eta hemendik zabaltzen da mundura; eta, beti euskal lurrarekin eta kulturarekin dugun konpromisoaren bitartez".
Ekitaldia bideoan (cc-ny-nc-nd EHU)
Uribe Kostak Gernikako Arbolaren kimu bat hartuko du gaurtik aurrera. Izan ere, Euskal Herriko Unibertsitateak Leioa eta Erandion duen campuseko sarreran Gernikako Arbolaren kimu bat landatu dute gaur, benekotasun ziurtagiria eta guzti. Horrela, bata bestearen ondoan egongo dira "euskaldunen ikurrik unibertsalena den Gernikako Haritza", eta Eduardo Txillidak EHUrentzat diseinatu zuen ikurra, "mundura zabaltzen den fruitu emankorra irudikatzen dauen beste zuhaitz bat", hain zuzen. Kimua landatzeko ekitaldia gaur goizean izan da, Iñaki Goirizelaia EHUko errektorea eta Ana Madariaga Bizkaiko Batzar Nagusietako presidenteak buru izan direla. Ekitaldian gogorarazi dute Gernikako Arbola eta bere sinbologia zabalduz joan dela gure artean eta dagoeneko hedaturik dagoela mundu osoan ere, esaterako Venezuelan, Kolonbian, Argentinan, Mexikon edo New Yorken, dorre bikiak zeuden "zero gunean". Joan den astean beste kimu bat landatu zuten Derioko Seminarioa zegoen tokian, Adiskidetasun Basoa deituko denaren lehen sustraiak jarriz. Argazkian, gaurko landaketa / © EHU.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!