Arratsaldeko 3etatik aurrera, alerta laranja aktibatuko dela, Eusko Jaurlaritzaren SOS Deiak zerbitzuak haize bolada bortitzengandik babesteko hainbat neurri gomendatu du:
• Leihoetan dauden objektuak kendu edo segurtatu (lorontziak, esekitokiak…)
• Pertsianak itxi eta jaitsi herritar bakoitzak bere etxebizitzan ezagutzen duen modu seguruenean utzita.
• Kendu balkoi eta terrazetatik haizeak mugi edo bota ditzakeen objektuak.
• Posible bada, gauez, seguruak izan daitezkeen lekuetan aparkatu autoak, jaus daitezkeen objektu edo edukiontziek kolpa ez ditzaten.
• Azkenik, lekualdatzerik egiterakoan jausi daitezkeen objektuekin kontuz izatea gomendatzen da.
Olatuak
Euskalmeten iragarpenaren arabera, depresio horrek berak oso baga garaiak eragingo ditu, 6-7 metroko altuera adierazgarrikoak ere arratsaldean, eta asteazkenetik aurrera iritsiko zaizkigu gurera. Oraingoan, baina, ez dira mareagora biziekin batera gertatuko: Bilboko portuan 20:52an izango da; 3,89 metro hartuko dituztela. Ostegunean, hilak 6, berriz, olatuak txikituz joango dira, baina asteburuan berriz indartu liteke itsasoa.
Labur esanda, oraingoan hego haize bortitza izango da aipagarriena, bihar arratsaldetik aurrera oso zakar astinduko duena eta asteazkenean zertxobait baretu ostean ostiralean, hilak 6, berriz indartu litekeena Olatuak ere handiak izango dira asteazken arratsaldean.
Denboralean jarraitu beharreko gomendioak
Eusko Jaurlaritzako Larrialdiei Aurre Egiteko eta Meteorologiako Zuzendaritzak hainbat gomendio egin die herritarrei denboralea gertatzen denean jarrai dezaten, "ondorio txarrak saihesteko eta ahal beste murrizteko":
• Bete agintaritza eskudunek emandako jarraibideak eta aholkuak.
• Ez sartu itsasora ezertarako.
• Urrundu olatuak lehertzen diren lekuetatik (arrokak, kai-muturrak, moilak).
• Ez joan itsas-pasealekuetara, kai-muturretara edo labarretara. Itsasoak eraman egin zaitzake.
• Informazioa uneoro jarrai daiteke, Euskalmeten web-gunean edo @Euskalmet Twitterren kontuan.
• Larrialdietan, deitu 112 zenbakira
Eusko Jaurlaritzako Segurtasun Sailak alerta laranja ezarri du berriro gaurko eta biharko, haize ufadak eta olatu handiengatik, hurrenez hurren. Gaurko alertari dagokionez, haize-alerta laranja abiarazi dute agerian diren tokietan, arratsaldeko 3etatik gauerdira. Bihar, asteazkena, ordea, itsasoko eta itsas bazterreko arriskuengatik ohartarazi dute, 12:00ak eta 24:00ak bitartean olatu handiak iragarri baitira. Euskalmet Euskal Meteorologia Agentziaren iragarpenen arabera, Ozeano Atlantikoan eratu diren depresio berriek haize bortitza ekarriko dute gurera, hegokoa batik bat, eta olatu handiak. Hego-haizearen eraginez, prezipitazioak ez dira apartekoak izango aste honetan, tenperatura epeldu egingo du eta ez da elurte aipagarririk izango. Euskalmeteko arduradunen iritziz, gaurkoan bizkor sakonduko den depresio bat eratuko da Atlantikoan, eta horren ondorioz hego-haizea zakartu egingo da egunak aurrera egin ahala, eta arratsetik aurrera agerian diren toki batzuetan, lurraldearen mendebaldeko mendietan batik bat, ufadek aise har lezakete 120 kilometro ordukoko abiadura. Toki babesetan, berriz, 8-90 kilometro ordukokoa izango da. Bihartik aurrea indarra galduko du haizeak. Argazkian, hainbat lagun itsasontzia lotzen artxiboko irudi batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun