Santa Marina Haitza kalean, tamaina handiko ezkiek itzal handiak ematen dituzte galtzadan, Zientoetxe eta Bostgarrena kaleen arteko zatian, bertan ipinitako argi-puntuekin lerrokatuta baitaude. Horren ondorioz, bi ikastetxetarako igarobidea den gune horretako segurtasun maila murriztuta dago. Horregatik, bost argi-puntu berri ipiniko dituzte zuhaitzak dauden aurreko espaloian eta lau argidun zutabea Bostgarrena kaleko bidegurutzeko errotondan. Jarduketa horrekin, argiztapenaren kalitatea asko hobetuko dela uste du Udalak, inguruko segurtasuna areagotuko delakoan.
Egun batzuk beranduago hasiko dira lanak Bolue kalean. Euskal Herria eta Arene tartean ipinitako argi-puntuak espaloi gainean dira gaur egun, bere eremu erabilgarria murrizten dutelarik, bai metroa erabiltzen duten pertsonen bai inguruko kaleetan barrena dabiltzan oinezkoen mugimendua baldintzatuz.
Aurreikusitako lanak bost argi-puntu berri ipintzeko egingo dira, instalazioaren baldintza teknikoak berritzeaz gainera, irisgarritasuna ere hobetuko dela, oinezkoentzat oztopo izan daitezkeen elementuak espaloi gainetik kenduta.
Gutxi gorabehera, bi kaleetako lanek hilabete bat iraungo dutela espero dute. Hori dela eta, Udaletik barkamena eskatzen dute lan horiek eragin ditzaketen eragozpenengatik.
Orain dela gutxi Algortako Gaztelugatxe kalean zein Iturgitxi kaleko jolasgunean egin bezala, Getxoko Udalak udalerriko beste bi tokitan lan berriak egingo ditu, "argiztapenaren kalitatea eta segurtasun eta irisgarritasun baldintzak hobetzeko". Herri lanak aste honetan hasiko dituzte Santa Marina Haitza kalean, Getxon, eta egun batzuk beranduago, Bolue kalean, Algortan. Bi leku horien artean hamar argi-puntu baino gehiago ipiniko dituzte, "energi-eraginkortasun handikoak, argiteria publikoaren instalazioak hobetu eta argi eskasiak eragindako arazoak konpontzeko", udaletxeko iturriek azaldu dutenez. Iturri berberek gogoratu dutenez, lan berri horiek Udala hiri-ekipamenduetan egiten ari den jarduketen barruan daude, "hiriko ekipamenduek eta argiteria publikoaren eraginkortasun energetikoa hobetzeko asmoz. Halaber, auzotarren eskaerak betetzea dute helburu". Azken hilabeteetan, 200.000 euro baino gehiagoko inbertsioa egin du Udalak lan horietan guztietan. Argazkian, udal arduradunak saskibaloian jolasten orain gutxi argiteria berria jarri den Iturgitxi parkean, artxiboko irudian / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun