Pintxo lehiaketaren V. edizioa martxoaren 29 eta 30eko zein apirilaren 5 eta 6ko asteburuetan izango da, Gabonetako aurreko egunotan ospatu beharrean. Daten aldaketa ostalariek luzatutako eskariei erantzunez egin dute, kaletik jende gutxiago ibiltzen den garaian egiteko eskatu baitzuten, hain zuzen ere, establezimenduetara hurbiltzera animatzeko.
Pintxo lehiaketaren azkenburukoa ostalariek izango dute dastagai. Izan ere, aurten hurrengo bost sari banatuko dira: GetxOnegin pintxo hoberenari, pintxo tradizional hoberenari; euskararen erabilera txukuna egiten duenari, barrarik onenari eta herri-epaimahaiarenari. Ostalariek pintxo bakarra aurkeztu ahal izango dute.
Oinarriak eta izena emateko fitxak hartu ahal izango dira Euskara Zerbitzuan (Algortako Basagoiti etorbidea, 20an dagoen Etxe Sorginduan) eta Getxolanen (Areetako Ogoño, 1). Informazio gehiago 944 660 010, 944 660 011 eta 944 660 140 telefono zenbakietan, Getxo.net udal web gunean eta gehi@getxo.net edo getxolan@getxo.net posta elektronikoetan.
GetxOnegin! Pintxo lehiaketa su txikian prestatzen dihardute jada. Gastronomia ekimena antolatzen duten Getxoko Udalaren Euskara Zerbitzuak eta, estreinako aldiz, Getxolan enplegu eta prestakuntzarako erakundeak izen-ematea zabaldu dute, otsailaren 21era arte. Izan ere, edizio honetako berritasun nabarmenena data aldaketa izango da, Gabonetako aurreko egunetatik martxoaren bukaera eta apirilaren hasierara pasatu baita lehiaketa. Horrekin batera, txapelketa bi asteburutan ospatuko da, lehen eta bigarren platera eskaintzeko asmoz. Antolakuntzan Getxolan ere sartu arren, Udalak ziurtatu du GetxOnegin!-ek Euskara Zerbitzuak orain arte jarritako helburuak jarraituko direla, alegia, euskara uztartzea langile eta bezeroen artean, euskara sustatzea euskara kalitate gehigarriaren adierazlea izan dadin establezimenduetan, irudi gastronomikoa indartzea, eta Getxo udalerriko pintxo-eskaintzari zabalkundea ematea. Argazkian, neguan pintxo lehiaketak utzitako lekua hartu zuen Pintxo Pote ekimenak / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun