Gauzak horrela, aurtengo laguntzen aldaketarik nabarmenak aurreko urtekoekin alderatuz bi dira. Lehenengoa, Getxoko elkarteetako begiraleek euskara ikasteko zuten 1.000 euroko diru-kopurua desagertu egin dela da, beste herritarrek dituzten laguntzeetara jo beharko dutela. Diru horrekin, gida-baimena euskaraz ateratzeko partida handitu dute, 3.400 eurotik 4.400era pasatuz. Bigarrena, laguntzak kaleratzen diren datak dira, azken urteotako goiztiarrenak baitira, auzokideen onerako.
Xehetasunak
Aurtengoak "baliabide ekonomikoen ezagatik getxoztarrak euskara ikasi gabe ez geratzeko" laguntzak direla defendatu du Getxoko Udalak. Zehazki, 90.400 euroetatik Udalak 86.400 banatuko ditu gizabanakoei zuzendutako diru-laguntzen artean eta beste 4.000 enpresei ematen dizkien laguntzetarako izango dira. Laguntzak eskatzeko epea kasu batzuetan datorren irailaren 30ean amaituko da eta beste batzuetan abenduaren 31n,
2016ko amaierara arte indarrean izango den ESEP, Erabilera Sustatzeko Ekintza Planak aurreikusten dituen diru-laguntzek “euskararen erabilera sustatzeaz gain, getxoztarren hizkuntza gaitasuna eta euskararekiko motibazioa eta interesa ere areagotu nahi dute”, azpimarratu du Kepa Miñambres Llona jarduneko Euskara zinegotziak.
Norbanakoen laguntzen multzoan, 80.000 euro euskara ikasi nahi eta baliabide ekonomiko nahikorik ez duten getxotarrentzat izango da. Kasu horietan eskaerak aurkezteko epea irailaren 30ean amaituko da eta diru-laguntza matrikularen kostuaren %80a izatera heldu ahal izango da, 2012an ezarri bezala. Aurretik ikasleek matrikularen %100 jasotzeko aukera zuten, egungo baldintza berberak bestez gero. Besteak beste, eskola-ordu kopuru zehatza betetzea eta Udalak eskatzaileari eskatuko dizkion diru sarreren mugen artean izatea.
Beste 4.400 euro, gidabaimena ateratzeko azterketa euskaraz egiten duten 17 eta 23 urte bitarteko gazteentzat izango dira, azterketa teorikoa euskaraz egiteagatik eskatzaileak 100 euro jasoko dituela. Elkarteetako aisialdiko begirale eta zuzendari agiriak lortzeko euskarazko ikastaroak egiten dituztenak laguntzeko 1.000 euro izango dira, beti ere laguntzak ikastaroaren %50ekoa baino ez dela izango. Hiritarrentzako laguntzen azken partida Udaleko eta erakunde autonomoetako langileek eta zinegotziek euskara ikas dezaten izango da, azken urteotan bezala. Hor, beste 1.000 euro aurreikusi dituzte.
Azkenik, merkataritza eta ostalaritza sektorean euskara sustatzeko atalari dagokionez, 4.000 euro bideratuko dira, nagusiki, errotuluak, olanak eta ibilgailu komertzialak euskaraz ipintzeko.
Kasu hauetan eskaerak aurkezteko epea abenduaren 31an amaituko da.
Diru-laguntzen ordainketa erregistroaren hurrenkerari estuki jarraituz egingo dira, aurrekontu partidan kreditu nahikoa dagoen bitartean. Diru-laguntza horiekin batera, Udalak beste zerbitzu batzuk mantenduko ditu euskararen erabilera sustatzeko helburuarekin, tartean, herriko elkarteei eskaintzen dizkien itzulpen zerbitzua, eta aholkularitza eta ekitaldietarako aurkezle euskaldunen zerbitzua eta Getxoko merkatariei nahiz ostalariei doan eskaintzen dizkien itzulpen eta maketazio zerbitzuak.
Argibide gehiagorako Getxoko Euskara Zerbitzuak sarean jarritako dokumentazioa aztertu daiteke.
Iaz bezala, Getxoko Udalak 90.400 euro inbertituko ditu aurten ere herritarrek euskara ikasi eta susta dezaten. 2012an, ordea, 113.000 euro bideratzen zuen Getxok, %20ko murrizketa ezarri aurretik. Gauzak horrela, bertako eta berezko hizkuntza ezagutzeko partida horiek 2004 eta 2005ean onartutakoen azpitik jarraitzen dute, urte horietako aurrekontuetan Iñaki Zarraoaren Gobernuak 110.000 euro gorde zituela euskaltegietako matrikulak finantzatzeko zein euskara sustatzeko hamaika jarduera burutzeko. Halere, orduan diru guztia ez zen erabili, 2005ean Udalak 76.552 euro besterik ez zuela gastatu. Ez zen gauza bera gertatu 2008an. Orduan, 98.783 euro banatu zituen Euskara Zerbitzuak, aurten aurreikusitakoa baino %9,3 gehiago. Orduan, 75.516 euro getxoztarren hizkuntza gaitasuna areagotzea helburu zuten diru-laguntzetan erabili zituzten eta beste 23.267 euroak, ordea, euskararen erabilera sustatzeko laguntzetan. 2009an, 100.000 euro bideratu ziren eta 5.000 gehiago hurrengo urtean. Aurreikusitako diru-kopururik garrantzitsuena 2011n eta 2012an izan zen, 113.000 euroko inbertsioa konprometitu zela. Gainera, ordurako aurretik laguntzen ziren hainbat partida Euskara Zerbitzuaren ohiko lanaren barruan gelditu ziren edo Bizkaiko Foru Aldundiak hartu zuen bere gain, Udako Euskal Unibertsitateko matrikulak bezala. Argazkian, Gidabaimena Euskaraz ataleko laguntzak dira igo diren bakarrak / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun