Algortara iritsi aurretik, Erandioko Hegoalde, Astrabuduako Egoki, Leioako Kurkudi, Itzubaltzeta / Romoko Branka, Sopelako Mikelats, Berangoko Sei Herri eta Urduliz Iretargi herriko tabernetatik igaro ziren. Izan ere, 35/02 eta 26/11 sumarioen barruan, Espainiako Auzitegi Nazionalean epaituak izaten ari diren 110 elkarteak eta 76 euskal herritarrak "libre uzteko" aldarrikatzea zen mobilizazioaren helburua.
Epaiketa politikoak
Urriaren 14an hasi ziren epaitzen Xabier de la Maza Peña gazte gorliztarra Espainiako Auzitegi Nazionalean, beste 39 neska-mutilekin batera, eta atzo amaitu. Bakoitzarentzat seina urteko espetxe zigorra eskatu du fiskalak, Segi gazte erakunde ilegalizatutako kideak izatea egotzita. Horretaz gain, hilaren 17an abiatu zen 35/02 sumarioko epaiketa. "Herriko tabernen bitartez ETA finantzatzea" leporatuta, ezker abertzaleko 36 kide epaitzen ari dira Espainiako Auzitegi Nazionalean. Bost bat hilabetez iraungo dute 35/02 sumarioko epaiketaren ahozko saioek. 372 urteko kartzela zigorra eskatzen du Fiskaltzak guztira; zortzi eta hamabi urte arteko zigorrak bakoitzarentzat.
Besteak beste, Franco eta Amezagari zortzina urteko kartzela zigorra eskatzen diete. Amezaga, adin txikiko bi seme-alabaren ama da eta eurak ez ezik, lanpostua bera ere utzi beharra dauka auzi saioetara joateko, Libre Getxon ekimenak salatu zuenez. Bestalde, Jose Luis Francok ez du epaiketako saioetara joan beharrik izango, konklusioak ematen diren azken egunean ezik. Algortarra adineko pertsona bat da eta bere osasun egoera dela eta, deklaratu behar duen saioetara baino ez bertaratzeko eskabidea egin zuen.
Jose Luis Franco 2002ko apirilaren 29tik 2003ko urriaren 28ra bitartean preso egon zen Navalcarneroko (Madril, Espainia) kartzelan eta Maite Amezaga 1998an, sei hilabetez, Avilakoan 18/98 sumarioa dela eta.
Halere, horiek ez dira Auzitegi Nazionalera joan behar izan duten lagun bakarrak. Izan ere, 35/02 sumarioko 36 auziperatuez gain, auzian sartutako herriko tabernak kudeatzen dituzten 110 kultur elkarteen presidenteak ere egon dira Madrilen, tartean zirela Josu Iratza, Christian Reinicke, Joserra Elkoroaristizabal, Angel Sedano, Josu Cerrato, Pedro Ruiz, Josu Iturburu eta Jon Aldatz Urdulizko Iretargi, Algortako Gorrondatxe, Leioako Kurkudi, Erandioko Hegoalde, Astrabuduako Egoki, Sopelako Mikelats, Itzubaltzeta / Romoko Branka eta Berangoko Sei Herri kultur elkarteen ordezkariak. Abokatuen eskaerari jarraiki, horiek ere deklaratu behar duten egunean eta azken saioan baino ez direla agertu beharko erabaki zuen epaileak. Akusazioen arabera, "ETA finantzatzeko ezinbesteko partaide" izanda ere, elkarte horiek eta euren ordezkariak ez daude auziperatuta, baina sozietateen ondasunak bahitzeko arriskua dago.
Larunbateko mobilizazioaren bideoa plazaratu du Sopela.net agerkari digitalak (© Sopela.net)
Espainiako Auzitegi Nazionalean atzo egin zuten urrian abiatutako 26/11 sumarioko epaiketaren azken saioa. Horrenbestez, epaiaren zain gelditu dira Segi gazte erakunde ilegalizatutako kideak izatea egotzita epaitutako 40 neska-mutilak, tartean Xabier de la Maza Peña gazte gorliztarra dela. Bakoitzarentzat sei urteko espetxe zigorra eskatzen dute. Hala ere, amaitu aurretik, hitza hartzeko aukera izan zuten auzipetuek. "Gure alegatua Euskal Herrian aurkeztu zuten ostiralean 40 lagunek, eta gure herriaren gehiengoak babestu du. Ez daukagu gehiago esateko", adierazi zuten. Hain zuzen, 26/11 sumarioko epaiketaren amaiera gertu zela, epaiketa politikoen kontrako eskualde mailako mobilizazioan parte hartu zuten larunbatean 300 herritar inguruk, eguraldi txarrari aurre eginez. Batetik, kotxe karabana bana egin zen Erandiotik eta Gorliztik abiatuta. Eta horiek biak Algortan bat egin zuten, bertan manifestazioa egiteko. Azkenik, De la Maza gazteak eta 35/02 auzian epaitzen ari diren Maite Amezaga algortarrak idatzia irakurri zuten. Azken sumario horri dagokionez, Jose Luis Franco algortarra, Galdakaon bizi den Izaskun Barbarias urduliztarra, Karmelo Landa Leioa eta Erandioko campuseko Literatura irakaslea eta hainbat urtez Getxoko Udalean lan egin eta PPk bertatik kaleratu nahi izan zuen Sabin del Bado sondikarra ere badaude akusatuen artean. Argazkian, larunbateko eskualde manifestazioa Algortan / © Sopela.net
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun