Uribe Kostako Eztabaida gune antiautoritarioak zinema bost lan labur, euskaraz, aurkeztuko ditu gaur, osteguna, iluntzeko 8:30etatik aurrera. Izan ere, ordu bat lehenagorako deituta zegoen ekimena, baina kolektiboko kideek azaldu dutenez, Arkaitz Bellonen heriotzagatik izango diren mobilizazioak direla eta, atzeratu dute, nahi duenak biak uztartu ahal izan ditzan. Ikusgai izango diren obrak honakoak dira: "Gosea" (Itziar Cantero, 11'), "Ama ona" (Laida Aranburu, 9'), "Bosgarren segmentua" (Ander "Parody", 7'), "Buruko Bidaia" (Claudia Urquijo, 4') eta "33 RPM" (Asier Kortabarria, 20'). Zine-foruma Zart ekoiztetxeak prestatu du, Short Film Caravan ekimena dela medio. Zarteko kideek adierazi bezala, "film laburrak ikusi zein zabaltzea ez da gauza batere erraza, eta are gutxiago zuzendari gazteen lehen lanez hitz egiten ari garenean. Egindako lanak hautsa hartzen egoteaz aspertuta, Short Film Caravan ekimena sortu dugu, lan hauek ikusteko erakus-lehio ibiltaria". Argazkian, "Ama ona" laneko fotograma bat / © Laida Aranburu Arruti.
Zart osatzen dutenen zein beste gazte batzuen lanak proiektatzeaz gain, Short Film Caravanek esperientziak eta iritziak elkarbanatzeko topagunea izan nahi du. Horretarako, film labur hautaketa bat herriz herri mugitzen ari dira, proiekzioaren ostean debaterako tartea sustatuz. Besteak beste, Algortan bezala, Bergaran eta Donostian ere izango dira.
Helburua film laburrei ahalik eta hedapen handiena ematea da, publikoarekiko gertutasunari lehentasuna emanez. Horrela, egitasmoarekin bat egiten duten gaztetxe, kultur etxe, areto, denda edo bestelako espazioetan burutzen dabiltza proiektua, ahalik eta toki gehienetara iristeko. Proiekzio bakoitzean film hauen lantaldeko kideak izango dira, aipatutako debateari hasiera eman eta sortzen diren galderei erantzuna emateko.
Hasiera batean bost dira proiektatuko diren film laburrak. Egitasmoak "aurrera egiten badu, film labur hauek beste batzuekin txandakatzeko aukera ere ikusten dugu, beste autore batzuei beraien lanak erakusteko aukera eskaintzeko", Zarteko kideek aurreratu legez.
Film laburren sinopsia
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun