Bitartean, bigarren autopsia egiten ari zaizkio Arkaitz Bellon preso politikoaren gorpuari, Berria.info agerkari digitalak jakinarazi duenez. Atzo goizean egin zioten lehena, Cadizko Auzi Klinikan; senideen konfiantzazko medikurik gabe, haiek konfiantzazko medikuak autopsian egon zitezela eskatua zuten arren. Senideen protestaren ondoren, beste azterketa bat egitea onartu zuen auzitegiak, eta gaur egiten ari zaizkio, klinika berean, senideen konfiantzazko medikuak auzi medikuekin direla. Bien bitartean, abokatuak Cadizko Puerto I-eko espetxean dira Bellonekin izan diren euskal preso politikoak ikustera. Elorrioarra zegoen modulu berean da Iñigo Gutierrez Carrillo algortarra. Bellonen heriotzaren berri izan ondoren espetxeko zuzendariordearekin bildu ziren haren moduluan dauden zortzi euskal presoak. Ondoren, Bellonen ziegan banan-banan sartu eta azken agurra ematen utzi zieten. Bere gauzak ere atera zituzten handik, Algortan atzoko manifestazioa abiatu baino lehen Etxerat elkarteak adierazi zuenez.
Euskal Herrira
Lehen autopsiaren emaitzen berririk ez da zabaldu. Auzi medikuek helarazi diote txostena senideei, baina bigarrenaren emaitza izan artean ez zabaltzea erabaki dute, Berria.info-k zehaztu duenez. Gaur, bigarren autopsia amaitu ondoren, espero da berriren bat izatea. Kazeta euskaldunaren arabera, gorpuaren azterketa egiten denean, lehen txostena egiten dute berehala medikuek, lehen ondorioen berri emateko. Ikusitakoaren arabera, Belloni heriotza zerk eragin dion jakinaraziko dute lehen txosten horretan medikuek. Litekeena da senideek gaur bertan jasotzea emaitza hori, baina ez da behin betikoa izango. Gaurko autopsia amaitutakoan, Euskal Herrira ekarriko dute presoaren gorpua; bere herrira, Elorriora. Hori ahalik eta arinen egin ahal izateko tramiteak egiten zebiltzan atzo arratsaldean Iñaki Goioaga eta Ainhoa Baglietto abokatuak, senideekin.
Etxerat elkarteak, presoaren heriotzaren inguruko zehaztasun guztiak argitzeko eskatu du. Gertatu denaren inguruko zalantzak plazaratu, eta Espetxe Zaintzako Zuzendaritza egin du heriotzaren erantzule: "Berak bermatu behar du preso guztien osotasun fisiko eta psikologikoaren zaintza, baina berak onartzen ditu jazarpen guztiak". Espetxe Zaintzako Zuzendaritzak lehen unetik presoa "berez" hil dela esan badu ere, Etxerat-ek ohartarazi du txosten medikoen arabera osasun arazorik ez zuela; "'traumatologia arazo arinak soilik'" zituela. "Bellonekin gertatutakoak espetxe politikaren ondorenak agerian uzten ditu. Kale eraso batean parte hartzea egotzita 13 urte eta 3 hilabeteko espetxe zigorra jarri zioten. Zigorraren bi herenak zein hiru laurdenak beteta zeuzkan arren, preso zeukaten; zigorra ia osorik betea zuen, baina lehen graduan zuten oraindik, bizi-baldintza gogorrenak dituen araudipean", salatu du Etxeratek. Presondegian bereziki jazarri diotela azaldu dute. Horren adibide, senideen arabera "gutxienez lau aldiz" jipoitu izana. Eta espetxerik gogorrenetan erregimenik zorrotzenetan izan dute.
Arkaitz Bellon gogoan Itzubaltzetan (© Koska kolektiboa)
Hamaika hilabete ere ez dira bete 2013ko martxoaren 15ean etxean preso zeukaten Anjel Figueroa Fernandez algortarraren heriotzak herritarren bihotzak kolpatu zituenetik. Handik bi astetara, hilaren 30ean, Xabier López Peña "Thierry" preso politiko galdakoztarra Fleury kartzelan hil zen, ondoezik jarri ondoren. Arkaitz Bellon, berriz, maiatzean zen ateratzekoa Puerto I (Cádiz) espetxetik, 13 urteko zigorra beteta. 36 urte zituen. Elorrioarraren gertukoei elkartqasuna adierazi eta Frantzia zein Espainiako estatuek darabilten "sakabanaketa politika ankerra" salatzeko asmoz, dozenaka lagun atera ziren atzo iluntzean kalera Uribe Kosta eta Erandion, Euskal Herri osoan bezala. Algortan ia 250 gizon-emakumek egin zuten manifestazioa. Itzubaltzeta / Romon 108 lagunek. Eta Leioan beste 80 inguruk. Eskualdeko gainontzeko herrietan egindako kontzentrazioei dagokienez, besteak beste, 13 lagun batu ziren Urdulizko BBVAn, 15 Gorlizko Txokoetxen, 47 Plentziako Piruli plazatxoan eta 60 bat Erandioko metro geltoki ondoan. Atzo bezala, gaur ere mobilizazioak izango dira gertatutakoa salatzeko: 12:00etan, elkarretaratzeak egingo dituzte Bilboko udaletxe aurrean, Donostiako Alderdi Ederren, Iruñeko Udaletxe plazan eta Gasteizko Andre Maria Zuriaren plazan, "Espetxe politika honi ez, sakabanaketa amaitu" lelopean, eragile ugarik deituta. Bellonen senide eta lagunek, berriz, agerraldia egingo dute Elorrion datozen egunetako ekitaldi eta mobilizazioen berri emateko. Arratsaldean, berriz, 18:30ean jarri dute hitzordua Xake plazako Itzubaltzeta / Romoko aldean; 19:30ean Sopelako udaletxe aurrean; 20:00etan Algortako Telletxe plazan eta Leioako Bulebarrean; eta 20:30ean Plentziako Pirulin. Arratsaldeko lehenengo orduan Algortan atxilotutako hiru lagunei dagokienez, 18:30ak pasata atera zituzten Neguriko ertzain etxetik. Argazkian, ia 250 bat lagunek egin zuten manifestazioa atzo Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun