Kanpaina honen abiapuntua SHK Sopelako Hondakinen Kontseiluak egindako lana da. SHK 2013ko martxoan hasi zen lanean eta udalerriko alderdi politiko eta elkarte ezberdinek osatzen dute. Kanpainak, gainera, Sopelako hainbat merkatarien babesa du. Tuperra erabiltzeak "abantaila ugari" ditu, Udala dioenez. "Alde batetik, erosoagoa da: etxera heldu eta zuzenean tupperra hozkailura sartu daiteke. Beste alde batetik, keinu txiki honekin papera eta plastikoaren kopurua nabarmen jaistea lortuko genuke, elikagaiak gordetzerakoan ez dugulako inolako hondakinik sortzen. Beraz, hondakin gutxiago sortzen dugunez, ingurumena zaintzen lagunduko dugu, eta horrek eragin zuzena du herrian eta herritar guztiengan", azaldu dute. Azkenik, kanpaina honen bidez herriko komertzioen kontsumoa ere bultzatu gura da.
Tupperra erabiltzeko "prozedura oso erreza" da: lehenik eta behin, erosketak egitera joan baino lehen tupper bat hartu beharko dugu etxetik. Harategi edo arraindegian erosten dugunean, dendariari tupperra emango diogu elikagaia bertan sartu dezan, plastiko edo papera erabili barik, eta guk etxera eraman dezagun.
“Sopelan tupperra kalera” kanpaina martxan jarri du tokiko Udalak, herriko saltokietan horren erabilera sustatzeko asmoz. Ekimenaren helburu nagusia honakoa da: arraina edo haragia erosterakoan plastikozko eta paperezko hondakinak ahalik eta gehien gutxitzea. Auzokideei erraztasunak emateko asmoz, Udalak familia-unitate bakoitzari tupper bana emango dio. Udaletxean edo Sopelarinen (Larrabasterrako udal bulegoa) jaso ahal izango dira, martxoaren 31ra arte, honako ordutegian: 09:00etatik 13:30ak arte. Debalde banatuko den tupper horrek "tamaina nahikoa du edozein elikagai gordetzeko", agintari sopeloztarrek aipatu dutenez; eta kanpoaldean SHK Sopelako Hondakinen Kontseiluaren eta Sopelako Udalaren logotipoa du. Gainera, lehenengo urtean tupperra erabiltzen duten auzokideek sari bat jasotzeko aukera izango dute. Hilabetero 30 euroko bonoa zozketatuko da tupperra erabiltzen duten auzokideen artean. 30 euroko bono hori herriko dendetan xahutzeko izango da. Zozketan parte hartzeko, auzokideek txartel bat bete beharko dute komertzioetan, eta kutxa baten barruan sartuko dute euren datuekin. Argazkian, tupper-ak / cc-by Collin Anderson.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun