Sopelako Udalbatzak azken osoko bilkuran hala onartu ostean, Sopelako Udalak dei egingo die Urdulizen kokatuko den Uribe Kostako Eskualde Ospitalearen proiektu integralean parte hartzen duten erakunde guztiei, eskualdeko ospitalea Urdulizen kokatzearen ondoriozko "arazo guztiak" batera eta zehatz-mehatz aztertzeko, "konponbide zuzen, egoki eta neurrizkoen bila". Beraz, honako erakundeei dei egingo die Udalak: Urdulizko Udala, Osakidetza eta Eusko Jaurlaritza, Bizkaiko Foru Aldundia eta Bizkaiko Garraio Partzuergoa. Proposizioa EHBilduren Udal Gobernuak aurkeztu zuen, eta onartua izan zen PSE-EEk emendakin bat sartu ostean. EAJk eta PPk aurka bozkatu zuten.
Egunero 2.700 erabiltzaile
Akordioan, Udalak "inguruko natura eta kultura ondarea errespetatuko duten konponbideak bilatzea" eskatzen die gai honetan parte hartzen duten erakundeei, batez ere funtsezko bi alderdi direla-eta: batetik, ospitale berrirako sarbideak: "garraio publikoaren erabilera hobetu eta sustatu behar da". Eta sarbide horiek eskualdeko sarean sartzea eta mantentzea. Izan ere, ospitalearen memoriaren arabera, Uribe aldeko 23 herritako 17.000 biztanleei zerbitzu emango die. Urtero, hurrengo zerbitzuak eskaintzeko eraiki da: 70.000 larrialdi, 144.000 kanpo kontsulta, 152.000 espezialitate kontsulta, 11.500 ingreso, 9.300 ebakuntza kirurgiko, eta beste 3.800 ebakuntza txiki. Datu horien arabera ospitaleak, egunero, 2.700 erabiltzaile izango ditu. Bertan lan egingo duten 800 langileez gain. Labur esanda, Galdakaoko ospitalearen zerbitzuen %80 izango ditu.
Urdulizko ospitaleak eragingo dituen "arazoez" informatuko ditu herritarrak Sopelako Udalak
Urdulizko Marutze auzoan eraikitzen ari diren Alfredo Espinosa ospitalea onurak ekarri baino "arazoak" eragingo dituela uste du Sopelako Udalak. Tokiko iturrien arabera, eskualde mailako erietxera egunero 900 autotik gora joango direla kalkulatu da; eta ondorioz, "Urdulizen aparkatzeko arazo larriak sortzeaz gain, Sopelako trafikoan eragozpen handiak" agertaraziko ditu. Agintari sopeloztarrek diotenez, Uribe Kostako korridoretik doanak hurrengo ibilbidea egin beharko du: Sopelan, Ugeragako errotonda, Gatzarriñe kalea, Larrabasterrako errotonda, Gatzarriñe bidea (BI-3124), Enrike Urrutikoetxea kalea eta Olabide kalea (bidegorri bat, industrialde bat, altxatako hainbat oinezko pasabide eta gomazko badenak gaindituz). Eta Urdulizen, Osteiko, Torrebarri eta Marutze sektoreak zeharkatu. Hori gutxi balitz, EHBilduren Udal Gobernuak kritikatu duenez, "Bizkaiko Foru Aldundiak dioenez, udalen ardura litzateke ospitalera heltzeko errepide berriak eraikitzea, argi dagoenean osasun zentro berriak eskualde osoari emango diola zerbitzu". Horiek egiteak eta mantentzeak "diru galera izugarria" ekarriko lieke tokiko erakunde biei. Horien guztien berri emateko, batzar batera deitu ditu gaur herritarrak Sopelako Udalak. 19:00etan izango da Kurtzio kultur etxean. Argazkian, 2010eko maiatzaren 17an jarri zuten Uribe Kostako ospitalaren lehen harria Urdulizen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun