Xabier Paya Ruiz bertsolari, Itzultzaile, bikoizlari, ikerlari eta irakasle algortarrak prestatutako "Ahozko euskal literaturaren antologia" lana argitaratu du Etxepare Euskal Institutuak, Berria.info agerkari digitalak zabaldu duenez. Ahozko euskal literaturak bere gaur arteko historia luzean emandako piezarik interesgarri eta esanguratsuenetako batzuk biltzeaz gain, haiek generoka sailkatzeko ardura hartu du, antologiaren egile gisa, Payak. Zortzi genero nagusi bereizi ditu horretarako: bertsolaritza (bat-bateko bertsolaritza eta bertso-paperak bereiziz horren barruan), koplak, genero epiko-lirikoa (herri lirika, narrazioak eta ele zaharrak, kantu epikoak eta baladak), herri antzerkia (pastorala, maskaradak eta irri antzerkia), heziketa generoa (haur jolasak, sehaska kantak eta igarkizunak), egunerokoak (txisteak, zirtoak eta atsotitzak), genero errituala eta genero aplikatuak (sermoiak eta beste). Herri tradizioko pieza askorekin batera, lehengo nahiz gaur egungo bertsolari ezagunenak ere jaso ditu algortarrak antologian, jatorrizkoan ez ezik gaztelaniara eta ingelesera itzulita. Argazkian, Xabi Paya 2008ko Bizkaiko Bertsolari Txapelketaren finalean.
Liburu bakarrean hiru hizkuntzatan (euskaraz, gaztelaniaz eta ingelesez) emana, Etxepare Euskal Institutua argitaratzen ari den Euskal Antologiak saileko hirugarren liburua da Payak apailatutakoa. Aurreko biak Mikel Aierberen "Euskal narratiba garaikidea. Katalogo bat" eta Jone Arroitajauregiren "Euskal haur eta aazte literatura" dira. Joxerra Garziaren hitzaurre bat ere badu liburuak, egileak berak idatzitakoaz gain.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun